CMM, nangungunang pelikula sa Netflix Philippines

Doble panalo naman ang Call Me Mother.

Ang pinarangalang Silver Best Feature Film Made in Asia sa ContentAsia Awards 2026 ay ang nangungunang pelikula naman ngayon sa Netflix Philippines.

Patuloy na umaantig sa puso ng mga manonood ang pelikula na idinerehe ni Jun Robles Lana dahil sa relatable at hitik sa emosyon na kwento nito sa mga sakripisyo at walang hanggang pagmamahal ng isang ina sa kanyang anak.

Nauna na rin itong nag-uwi ng apat na parangal sa 51st Metro Manila Film Festival Gabi ng Parangal, kabilang ang Best Actor para kay Vice Ganda, Best Child Performer para kay Lucas Andalio, 3rd Best Picture, at Gender Sensitivity Award.

Nagtala naman ito ng P392 million na kita sa takilya sa loob at labas ng Pilipinas, at nagsilbi rin itong opening film para sa Philippines-Japan Film Festival 2026.

Ang Call Me Mother ay mula sa produksyon ng Star Cinema, The IdeaFirst Company at Viva Films.