“Numero unong violator”

Si Mayor Nestor Archival nalay nagpugong aron di hingpit mabuak ang ilang alyansa sa politika ni Vice Mayor Tomas Osmena. Sa higayon nga mosukol si Archival sa mga padungog-dungog ug pangatake ni Osmena siguradong mabugto ang ilang relasyon sa politika.

Hangtod kanus-a niya ibaliwa ang mga pagsaway sa bise mayor aron magpabilin ang ilang alyansa?  Panahon nalay giagad moabot ang kinutoban sa pasensiya ni Archival, labi pa og matandog ang iyang garbo, ug masubli ang nangagi sa kasaysayan sa mga sakop sa Bando Osmena Pundok Kausawagan (BOPK) nga nahimong mayor---silang tanan nahimong kontra ni Osmena.

Daghan na ang mga higayon nga gisaway ni Osmena si Archival apan gibaliwa lang kini sa mayor. Ang labing awahing birada ni Osmena batok kang Archival may kalambigitan sa kontrobersiyal nga traffic scheme diha sa Banilad-Talamban corridor.

Ang administrasyon ni Archival mideklarar sa Ban-Tal isip “traffic discipline zone” aron pagsulbad sa problema sa trapiko sa maong dapit. Apan naputos sa mga pagsaway ang maong sistema tungod sa giingong kakuwang og konsultasyon sa mga apektado.

Tungod sa daghang reklamo gikan sa mga naapektohan nga mga motorist, ang konseho sa syudad mihimo og executive session niadtong Martes diin gituki ang maong isyu. Atol sa executive session way lipud-lipod nga gisaway ni Osmena si Archival ug gihinganlan nga maoy nag-unang violator sa lagda sa trapiko diha sa Ban-Tal. Sumala ni Osmena nga samtang ang ordinaryong mga motorista nag-antos pagsunod sa huot nga dagan sa trapiko, ang mayor yano ra nga molusot gamit ang iyang motorcycle escorts nga dunay blinkers ug wangwang.

Husto ang bise mayor sa iyang giingon nga kun buot ang mayor og disiplina sa karsada angayang siya maoy unang mosunod sa lagda. Dili sab husto nga lakip ang iyang babayeng higala yano rang makalusot-lusot sa trapiko tungod gihapon kay dunay motorcycle escorts. Giangkon ni Osmena nga daghang reklamo iyang nadawat nga dili lang ang mayor ang abusado kun dili lakip na ang iyang higalang babaye.

Dinhi ko bilib ni Osmena, bisan iyang kauban sa BOPK si Archival apan wala gyud siya magpanuko pagsaway sa tataw nga abuso sa pwesto. Kun may dyutay’ng kaikog ang mayor sa mga magbubuhis angayan niyang ipasabot unsa ka tinuod ang gitug-an sa bise mayor. Labaw na niyang angayang hatagan og husay ang publiko unsay katungod sa higala niyang babaye nga magbaton og motorcycle escorts?