10K bagong school counselor associates target ng DepEd
MANILA, Philippines — Target ng Department of Education (DepEd) na makapag-deploy ng nasa 10,000 bagong school counselor associates hanggang sa katapusan ng taon.
Ayon kay Education Secretary Sonny Angara, pinapabilis nila ang recruitment at deployment ng 10,000 SCA sa buong bansa para masuportahan ang mental health ng mga mag-aaral, kasunod na rin ng mga insidente ng karahasan sa loob ng paaralan.
Nabatid na matapos ang opisyal na pag-apruba mula sa Civil Service Commission (CSC) noong Hunyo 30, 2026, at paglikha ng 10,000 plantilla items para sa SCA I ng Department of Budget and Management (DBM) noong Hulyo 15, 2026, pinaikli ng DepEd ang kanilang standard hiring process sa 36 araw na lamang.
Anang DepEd, sa ilalim ng kanilang digital hiring portal, na Agile Gateway for Appointments and Placements (AGAP), hanggang Agosto 27, 2026, nasa 9,702 items na ang kanilang nai-post.
Sa naturang bilang, 785 posisyon na ang kasalukuyang bukas para sa aplikasyon; 8,811 naman ang under assessment, at 106 ang para sa appointment.
- Latest
