Lachica hindi empleyado ng OVP - Ortonio

MANILA, Philippines — Inihayag kahapon ni Office of the Vice President (OVP) Assistant Secretary Lemuel Ortonio na si ­dating Vice Presidential Security and Protection Group (VPSPG) chief Colonel Raymund Lachica ay hindi ­empleyado kundi itinalaga sa OVP kung saan ipinagkatiwala ang P500 milyon piso na confidential funds.

Sa pagtatanong ni Senator-Judge Vicente Tito Sotto III, sinabi ni Ortonio na itinalaga lamang si Lachica ng Armed Forces of the Philippines (AFP) bilang group commander ng Vice President Special Protection Group.

Kinumpirma rin ni Ortonio na lahat ng administrative at financial matters kasama na rin ang Human Resources matters ng OVP ay dumaraan sa kanya.

Inamin ni Ortonio na wala siyang personal na kaalaman sa aktuwal na paggastos ng milyon-milyong pisong pondo.

Kinumpirma rin ni Ortonio na alam ni Lachica ang paggamit ng pera dahil ito ang namuno sa seguridad ng OVP.

Naging kontrobersiyal ang liquidation documents dahil sa mga kahina-hinalang pangalan sa acknowledgment receipts gaya nina “Mary Grace Piattos,” “Chippy McDonald,” “Timon Andrew Pusa,” “Antonio Pagong,” “Shane Ngitngit,” “Don Piang,” “May Piang” at “Xuniso P. Belat.”