Nakuhaa’g mga armas, granada

CEBU, Philippines — Managsuon nadakpan tungod sa pagtinil og mga armas , drugas ug granada diha sa ilang balay sa Sitio Makugihon 1, Barangay Manatad, Sibonga, Cebu, sayo sa buntag niadtong Agosto 25, 2026.

Ubos sa Oplan Paglalansag Omega gironda sa CIDG Cebu CFU, uban sa RIU7, RFMB7 ug Sibonga Municipal Police Station sa Cebu Police Provincial Office ang panimalay nilang Arnie Llanos, 26, nailhan usab sa mga alyas nga “Arnie Logronio Llanos” ug “Arnie Logronio” ug Gerald Logronio, 28.

Matud sa kapulisan, usa ka confidential informant ang mitaho nga si Arnie magdaladala og caliber .45 nga armas ug mga bala sulod sa iyang pinuy-anan ug magdadala sad ani sa gawas kun mahubog.  Ang igsuon niini  gikatahong nakit-an nga adunay dalang usa ka .357 caliber revolver nga adunay lima ka bala.

Tungod niini, nikuha ang mga otoridad og search warrant nga gi-isyu niadtong Agosto 18, 2026 ni Executive Judge May Faith L. Trumata-Rebotiaco sa Regional Trial Court Branch 7 sa Argao, Cebu.

Pag-abot sa mga operatiba kalit nidagan sa kawayanan si Arnie apan naapsan siya ug nadakpan. Sa pagsiksik sa ilang balay nadiskubrehan ang nagkadaiyang mga klase sa armas ug uban pang ebidensya sama sa usa ka .357 caliber revolver nga walay serial number, unom ka bala, usa ka itom nga holster, usa ka KG9 submachine gun, usa ka magazine niini, usa ka caliber .45 pistol nga walay serial number, usa ka magazine ug upat ka bala alang niini, ug usa ka hand grenade.

Nasakmit usab ang usa ka sling bag ug tulo ka heat-sealed transparent plastic sachet nga naay sulod nga gituohang shabu. IBM BANAT NEWS