Tag-iya sa pusil, pakasohan sa DOJ
CEBU, Philippines — Girekomendar sa Department of Justice (DOJ) ang pagpasaka og kaso batok sa tag-iya sa usa sa mga pusil nga gigamit sa pagpamusil sa San Jose National High School sa Tacloban City niadtong Hunyo 22, diin tulo ang namatay ug 20 ang naangol.
Matud ni Justice Secretary Fredderick Vida niadtong Lunes, nakit-an sa Tacloban prosecution office nga dunay probable cause aron kasuhan og criminal negligence ang tag-iya sa pusil. Wala hinuon niya ibutyag ang ngalan niini atol sa congressional budget hearing.
Duha ka estudyante, 14 ug 15 anyos, ang namusil sulod sa maong eskwelahan nga niresulta sa kamatayon ug pagkaangol sa ubang mga estudyante. Ang 14-anyos giingong migamit og .9mm pistol nga nakarehistro sa iyang iyaan nga usa ka policewoman, samtang ang 15-anyos giingong migamit og .38-caliber revolver nga nakarehistro sa usa ka security agency nga nakabase sa Cebu. Sumala ni Vida, “seeing a pattern” ang mga awtoridad sa sunod-sunod nga insidente sa school violence nga nahitabo sa nasud sa miaging mga bulan. Nagpasidaan sad si Vida bahin anang gitawag niyang “groomers” nga target ang mga bata nga gaduwa og online games ug aghaton sila ngadto sa mga chat room diin didto sila i-brainwash para maghimo og mga tahas nga kasagaran bayolente ug makadaut kanila.
Safety Drill
Samtang, gi-postpone sa Department of Education (DepEd) ang Nationwide Simultaneous School Safety Drill for Active Attack Incidents nga gitakda untang himuon kagahapon, Martes.
Matud ni Education Secretary Sonny Angara, gi-defer ang maong kalihokan aron maapil ang mga rekomendasyon sa mga eksperto sa psychosocial support.
Nanawagan ang Philippine Psychiatric Association ug Philippine Society for Child and Adolescent Psychiatry nga i-defer ang shooting drills tungod sa mga pagtuon nga nag-ingon nga mahimong maladlad ang mga estudyante sa hyper-realistic nga mga bayolenteng senaryo nga posibleng makaapektar sa ilang panghunahuna.
Sa laing bahin, giingon ni PNP public information chief Col. Allen Rae Co nga gibalik na sa iyang pamilya katong junior high school student sa Pinamungahan nga nasakpang nagdala og armas sa iyang bag sulod sa eskwelahan.
Una siyang gidala ngadto sa local social workers alang sa intervention ubos sa Republic Act No. 9344 o Juvenile Justice and Welfare Act, apan giuli siya sa pamilya tungod sa kakulang sa personnel ug tukmang pasilidad nga modumala sa maong kaso.
Non-Bailable
Samtang, gisugyot ni Interior and Local Government Secretary Jonvic Remulla ang mas bug-at nga silot alang sa mga kalapasan nga may kalabotan sa loose firearms, lakip ang paghimo niini nga nonbailable ug pagbilanggo og hangtod 20 ka tuig. “I’m asking Congress to take steps to make it non-bailable and to make it [punishable by a jail term of] 20 years,” dugang niya.
Una nang nanawagan si Remulla sa mga magbabalaod nga usbon ang Republic Act No. 8294, o “Robin Padilla Law” aron himuong non-bailable ang mga kaso nga may kalabotan sa loose firearms. “Gun ownership also carries with it gun responsibility. The government should have the right to inspect their homes at any time and to see if the guns are in safekeeping at any time,” matud niya. IBM BANAT NEWS
- Latest
