All-Filipino Gilas malakas pa rin

MANILA, Philippines — Optimistiko pa rin si Gilas Pilipinas head coach Tim Cone sa magiging kampanya ng kanyang bataan sa kabila ng pagkawala ni naturalized player Justin Brownlee para sa FIBA World Cup Asian Qualifiers.

Hindi maglalaro si Brownlee sa second round ng qualifiers dahil nagpapagaling pa ito sa kanyang injury.

Wala naman si Angelo Kouame na may kontrata pa sa France habang hindi umabot ang Philippine passport ni Bennie Boatwright.

Kaya naman, walang magawa si Cone kundi ang mag moveon at itutok ang buong atensiyon nito sa mga players na nasa lineup.

“We couldn’t get Bennie Boatwright his papers. He still doesn’t have his passport. He hasn’t had his final approval yet. We haven’t been able to get that done. Our other naturalized player that we would have brought, Ange Kouame, he is in France under contract,” ani Cone.

Mabuti na lamang at nagbalik si Kai Sotto para maglaro sa qualifiers.

“We are going to be attending this window all-Filipino,” ani Cone.

Nananatiling malakas ang Gilas Pilipinas dahil makakasama ni Sotto sa ratsada sina many-time PBA MVP June Mar Fajardo at AJ Edu.

“With Kai here, June Mar Fajardo, and AJ Edu, we feel we have the requisite size to be successful in this window,” ani Cone.

Haharap pa naman ang Gilas Pilipinas sa dalawang importanteng laro sa second round.

Una na kontra sa Jordan sa Agosto 28 kasunod ang Iran sa Agosto 30 na parehong lalaruin sa Mall of Asia Arena sa Pasay City.

Nasa matinding ensayo na ang Gilas Pilipinas upang pag-aralan ang galawan nito nang wala si Brownlee.