DepEd Mandaue mopahigayon og simultaneous safety drill

CEBU, Philippines — Nagpadayon ang koordinasyon sa Department of Education (DepEd) Mandaue City Division uban sa mga lokal nga otoridad ug mga opisyal sa eskwelahan alang sa giplanong simultaneous safety drill alang sa active attack incidents.

Gipahigayon kagahapon ang coordination meeting nga gitambongan sa kagamhanan sa Dakbayan sa Mandaue, mga school principal sa public ug private schools ug mga personnel sa Mandaue City Police Office (MCPO), Bureau of Fire Protection (BFP), Philippine Coast Guard (PCG), City Disaster Risk Reduction and Management Office (CDRRMO) ug City Social Welfare and Development Services Office (CSWSO).

Tumong sa tigom nga masiguro nga klaro ang papel sa matag ahensiya ug eskwelahan sa pagresponde sa usa ka active attack situation lakip na ang psychological first aid ug psychosocial support alang sa mga estudyante. Gipahibalo sa DepEd Central Office nga i-postpone ang nationwide simultaneous safety drills nga gikatakdang himuon karong adlawa ngadto sa unang semana sa Septiyembre gumikan sa pagsuspende sa face-to-face classes sa pipila ka lugar tungod sa dili maayong panahon.

Gimandoan sa DepEd ang mga eskwelahan nga likayan ang hyper-realistic simulations nga mahimong makahatag og kahadlok o distress sa learners.

Matod ni Dr. Bianito Dagatan, superintendent sa DepEd Mandaue nga magpadayon gihapon ang koordinasyon ug pagplano bisan gi-postpone ang drill, samtang gihulat ang tukmang petsa sa Septiyembre. Gidasig usab ni Dagatan ang mga eskwelahan nga maghimo og table discussions uban sa uniformed personnel, social services ug mental health personnel aron maplano ang contingency measures nga angay sa ilang tagsa-tagsa ka sitwasyon. Sa open forum, gitumbok ni Marivic Bathan, presidente sa Mandaue Private School Administrators ang panginahanglan nga ikonsiderar ang posibleng epekto sa drill sa learners.

Matud ni Bathan nga ang mga adult personnel sa eskwelahan kinahanglang mas maandam samtang kinahanglan nga ampingan ang mga bata batok sa posibleng dugay’ng epekto sa trauma bisan practice lang ang drill.

Gipadayag ni Dagatan ang papel sa mga ginikanan sa safety planning ug iyang hisgotan ang ilang papel sa umaabot nga Parents-Teachers Association assembly sa Septiyembre 9, 2026.

Samtang, si Atty. Riczen Gingoyon, executive secretary ni Mayor Thadeo Jovito Ouano nagkanayon nga bukas ang city government sa mga sugyot gikan sa mga eskwelahan, ginikanan ug mga eksperto aron masiguro nga ang drill angay sa matag school setting. (BANAT NEWS)