Mikee Mojdeh sumisid ng 5 golds

MANILA, Philippines — Humakot si Mikhael Jasper Mikee Mojdeh ng Immaculate Heart of Mary College-Parañaque ng limang gintong medalya sa Private School Association of Parañaque (PSAP) swimming tournament na magsisilbing daan para makapasok sa Palarong Pambansa sa susunod na taon.

Inilabas ni Mojdeh ang bagsik nito matapos pahgharian ang elementary boys 200m freestyle sa bilis na dalawang minuto at 31 segundo para makuha ang kaniyang unang gintong medalya.

Hataw pa ang 11-anyos Grade 6 student ng ginto sa kaniyang paboritong 200m backstroke event kung saan inirehistro nito ang isang minuto at 21 segundo.

Namayagpag din si Mojdeh sa 200m individual medley (2:53), 400m freestyle (5:25) at 50m backstroke (36.00) para makumpleto ang matamis na sweep sa lahat ng kaniyang limang events.

“These gold medal performances reflect the incredible dedication, discipline, and relentless drive of our athletes. Winning at this level isn’t an accident—it’s the result of hours in the pool, unwavering focus, and a relentless desire to excel,” ani BEST team manager Joan Mojdeh.

Wagi rin ng gintong medalya ang iba pang Behrouz Elite Swimming Team (BEST) members na sina Allen Miguel Fallarcuna, Tiffanie Amatorio at Ada Leandra De Guzman sa kani-kaniyang dibisyon.

May limang ginto rin si Fallarcuna sa 400m freestyle (5:21), 200m butterfly (2:58), 200m individual medley (2:52), 100m butterfly (1:20) at 400m Individual medley (6:08).

Winalis din ni Amatorio ang lahat ng limang events nito sa 50m butterfly (34.00), 200m individual medley (3:00), 100m freestyle (1:12), 50m freestyle (32.00) at 200m freestyle (2:46).

Sa kabilang banda, may dalawang ginto at dalawang pilak si De Guzman kung saan nanguna ito sa 50m breaststroke (47.00) at 100m breaststroke (1:43) habang pumangalawa ito sa 400m freestyle (7:19) at 100m butterfly (2:08).

“Seeing our swimmers stand on top of the podium makes all the early mornings and intense training sessions worth it. I couldn’t be prouder of the heart, character, and sheer determination our team demonstrated in every event,” dagdag ni Mojdeh.

Sunod na sasabak ang BEST tankers sa Paralong Pambansa Division Meet na magsiislbing tulay para makapasok sa Regional Meet.