4,282 ka bakanteng trabaho gitanyag sa mega job fair

CEBU, Philippines — Mokabat sa 1,263 ka mga nangitag trabaho ang mitambong sa 2026 World Café of Opportunities (WCO) Mega Local and Overseas Job Fair nga gihimo niadtong Sabado sa SM Seaside City Cebu, diin 4,282 ka bakanteng trabaho ang gitanyag sa 26 ka mga employer. Base sa datos sa Cebu City Department of Manpower Development and Placement (DMDP), 23 ka employer ang nagtanyag og 2,222 ka lokal nga bakanteng trabaho, samtang tulo ka overseas employers ang adunay 2,060 ka job openings.

Mokabat sa 192 ang na hire-on-the-spot diin 147 niini mga babaye ug 45 mga lalaki.

Ang kalihokan giorganisar sa Technical Education and Skills Development Authority (TESDA) Cebu Provincial Office, sa pakigtambayayong sa DMDP, Department of Migrant Workers (DMW), ug SM Seaside City Cebu. Ang WCO kabahin sa pagsaulog sa National Tech-Voc Day ubos sa Republic Act No. 10970, nga nag-ila sa dakong papel sa technical-vocational education and training sa pagpalambo sa kahanas sa mga trabahante.

Lakip sa mga ahensiya sa gobyerno nga miapil mao ang PhilHealth, Pag-IBIG, PSA, NBI, SSS, DMW, LandBank of the Philippines ug Department of Labor and Employment. — /MEL (BANAT NEWS)