Mandaue magdugang og psychometricians

CEBU, Philippines — Magdugang og psychometricians ang kagamhanan sa Dakbayan sa Mandaue aron mapalig-on ang mental health support alang sa mga estudyante sa siyudad.

Gihisgotan ang plano atol sa multi-agency meeting niadtong Miyerkules sa hapon, Agosto 19, 2026 diin gitambongan sa city government pinangulohan ni Mayor Thadeo Jovito “Jonkie” Ouano, Department of Education-Mandaue, Mandaue City Police Office, City Substance Abuse and Mental Health Services Office (SAMHSO) ug ubang concerned offices. Matud ni Atty. Riczen Gingoyon, executive secretary ni Ouano nga usa sa mga gihisgotan sa tigom ang panginahanglan sa sayong pag-ila ug intervention sa mga estudyanteng mahimong nag-atubang og psychological o emotional difficulties. Ug kinahanglan nga hatagan og pagtagad sa mga ginikanan, magtutudlo ug uba’ng hamtong ang kalit nga kausaban sa naandan nga pamatasan sa usa ka bata. Lakip sa iyang gihisgotan ang kalit nga pagkawala sa interest sa mga butang nga kaniadto ganahan ang bata, sama sa pag-drawing, arts o musika. Si Gingoyon nagkanayon nga base sa mga pagtuon nga naobserbahan sa SAMHSO, ang maong mga kausaban angay nga mahimong hinungdan aron duolon ug estoryahan sa mga hamtong ang bata. Mas nakita ang panginahanglan sa dugang nga mental health personnel sa mga pampublikong eskwelahan diin limitado ang guidance counseling resources. Gipadayag ni Gingoyon nga kasagarang adunay guidance counselors ang mga pribadong eskwelahan apan pipila lang sa mga public school sa siyudad ang adunay susamang personnel.

Aron matubag kini nga kakulangon, gilaoman nga maglusad ang SAMHSO og inisyatibo sa Septiyembre ug nangayo og tulo ka dugang nga psychometricians nga motutok sa mga estudyanteng nagkinahanglan og mental health support. Sa laing bahin, giplanohan sa nasudnong kagamhanan ang paggahin og P802 milyones sa sunod tuig alang sa pag-hire og 2,021 ka bag-ong guidance counselor sa mga pampublikong elementarya ug high school aron mapalig-on ang mental health services sa Department of Education (DepEd).

Gipadayag kini ni House Minority Leader ug 4Ps Party-list Representative Marcelino “Nonoy” Libanan kagahapon. Matud ni Libanan nga gikinahanglan ang dugang nga paggasto sa gobiyerno aron mapalig-on ang support system alang sa matag estudyante ilabi na kadtong nag-atubang og mga kalisdanan. Si Libanan nagkanayon nga tukma ang maong dugang nga pundo tungod sa nagkadaghang kabalaka sa mga eskwelahan kabahin sa bullying, mental health sa mga estudyante ug hulga sa trahediya. Gibutyag ni Libanan nga ang gisugyot nga 2027 national budget naglakip og P802 milyones alang sa pag-umol og 1,800 ka bag-ong School Counselor Associate I positions ug 221 ka bag-ong School Division Counselor positions sa DepEd. Dugang ni Libanan nga importante ang papel sa guidance counselors sa pagtabang sa mga magtutudlo, ginikanan ug school administrators aron masabtan ug matubag ang mga estudyanteng mahimong nag-atubang og emosyonal, behavioral o psychological nga mga problema. — /BDB (BANAT NEWS)