“58th” ipasalida sa Los Angeles

Ipasalida sa Los Angeles, California ang Pinoy documentary film nga “58th” nga nagdala sa istorya sa mga biktima ug pamilya nga nangita gihapon og hustisya human sa Maguindanao massacre.

Ang “58th”, nga gi-produce sa GMA Pictures ug GMA Public Affairs, apil sa mga pelikulang ipasalida sa Manila International Film Festival (MIFF) karong tuiga alang sa North American premiere niini.

Gikatakdang ipasalida ang pelikula karong Septiyembre 5, 2026, sa TCL Chinese Theatre sa Hollywood, Los Angeles.

Si Glaiza De Castro ang bida sa pelikula nga nagdala sa istorya ni Reynafe Castillo, nga nagpadayon sa iyang dugay nang pakigbisog aron makuha ang mga tubag ug opisyal nga pag-ila sa iyang amahan isip ika-58 nga biktima sa Maguindanao massacre.

Gipakita usab sa “58th” ang kasakit ug pagbangotan sa mga pamilya sa mga biktima, lakip na ang ilang padayong pagpangita og hustisya alang sa trahedya nga nahitabo.