Moalboal miresbak sa Badian

Kampiyon sa Calderon Cup-Alcantara Fiesta League

CEBU, Philippines — Ang madasigon nga spikers sa Moalboal mipayaka sa Badian sa upat ka sets, 3-1, aron paglugwa nga kampiyon sa 2026 Calderon Cup-Alcantara Fiesta League niadtong Sabado, August 22, didto sa Alcantara Sports Complex sa habagatang bahin sa Sugbo.

Luyo sa eksplosibong salida sa bitoon nilang si Jasmine Omagac, ang Moalboal impresibong midaog sa unang set, 25-14.

Ang Badian nakabawi hinoon sa ikaduhang set apan munasginhawa nilang gipiog ang Moalboal, 25-23.

Sa ikatulong set, ang Badian nahimong mas agresibo ug misutoy ngadto sa 22-18 nga bentaha apan ang Moalboal miusab sa dagan sa duwa pinaagi sa pagkadlit og lima ka sagunson nga puntos aron ilogon ang labaw, 23-22.

Nakatabla man tuod ang Badian, 23-23, apan didto ra sila taman kay ang Moalboal mibirada og duha ka sunod-sunod nga puntos aron silyohan ang ikatulong set, 25-23, nga naghatag kanila og 2-1 nga bentaha.

Nakasustinir sa ilang kainit, ang Moalboal hingpit nga mipatikangkang sa Badian sa ikaupat nga set, 25-20, aron sakmiton ang gihandum nilang titulo.

Labaw sa pagbulsa sa  P20,000 nga ganti, usa ka tam-is nga panimalos ang nakab-ot sa Moalboal, nga nakagiahum og mapait nga kapildihan sa Badian sa finals sa labing unang Calderon Cup Developmental League Volleyball Tournament niadtong Mayo.

Ang alas nilang si Omandac nakadawat og insentibo isip Finals Most Valuable Player sa duha ka adlaw nga torneyo nga kabahin sa grassroots sports development program ni kongresista Patsy Calderon sa ikapitong distrito sa Sugbo.

"Para ni sa tanan nga taga Moalboal ug sa tanan nga misuporta namo, labi na si Mayor (Titing) Cabaron nga wala'y undang paghatag ug suporta sa amo nga team," matud pa ni Moalboal coach Arlan Abrenica.

"Nagpasalamat sad mi ni Cong. Patsy Calderon ug Mayor Fritz Lastimoso sa pag-organize ani nga tournament ug paghatag higayon sa mga players nato sa seventh district," dugang pa ni Abrenica.