Managkapuyo nadakpan sa buy-bust operation'

CEBU, Philippines — Duha ka managkapuyo ang nadakpan sa kapulisan atol sa usa ka buy-bust operation sa Barangay Binlod, Argao, Cebu, alas 10:11 sa buntag niadtong Biyernes, Agosto 21, ug nakuhaan og kapin 110 gramos nga gituohang shabu nga gibanabanang nagkantidad og P748,000.

Ang mga suspek usa ka 47-anyos nga lalaki nga residente sa Barangay Binlod ug ang iyang 37-anyos nga partner nga taga-Barangay Poblacion, Ronda.

Matud sa Argao Municipal Police Station, gituohang nalambigit ang duha sa dinagkong pag-apod-apod sa ilegal nga droga sa Argao ug sa mga silingang lungsod sa habagatang bahin sa Cebu.

Gibana-banang 110 gramos nga gituohang methamphetamine hydrochloride o shabu, nga adunay gibanabanang street value nga P748,000 ang nasakmit gikan sa duha.

Base usab sa police records, dili na unang higayon nga naatubang og kaso nga may kalabotan sa ilegal nga droga ang 47-anyos nga lalaki ug ang iyang kapuyo.

Paglapas sa Republic Act 9165 o Comprehensive Dangerous Drugs Act of 2002 ang ipasakang kaso batok sa duha. (BANAT NEWS)