EATOF Gen. Assembly anhi sa Sugbu buhaton

CEBU, Philippines — Andam nang modawat og mga 120 ka delegado gikan sa nagkadaiyang bahin sa East Asia ang Probinsiya sa Sugbo alang sa 19th East Asia Inter-Regional Tourism Forum (EATOF) General Assembly nga ipahigayon sa probinsiya sa Septembre2 hangtud 4, 2026.

Ang tulo ka adlaw nga internasyonal nga kalihukan maghiusa sa mga gobernador, standing commissioners, tourism officials, akademiko, mga stakeholder sa industriya ug uban pang representante sa mga miyembro sa EATOF. Gipahibalo ni Cebu Provincial Government Chief of Staff Charlton James Canoy nga mokabat sa duha ngadto sa tulo pa lamang ka gobernador ang nakumpirma sa pagkakaron, samtang ang ubang probinsiya mahimong ipadala ang ilang vice governor, deputy vice governor o tourism officials.

“More or less 10 ka delegates per province,” matud ni Canoy. Lakip sa mga nikumpirma nga partisipante ang Sarawak sa Malaysia, Luang Prabang sa Laos, Tottori sa Japan, Töv sa Mongolia, Quang Ninh sa Vietnam, Gangwon sa South Korea, Siem Reap sa Cambodia ug Cebu Province. Gilauman nga moabot ang mga delegado sa Cebu sa Sept 1, usa ka adlaw sa wala pa ang opisyal nga pagsugod sa kalihukan. Ang opening ceremony himuon sa Sept. 2 sa Mactan Expo Center.

Lakip sa unang adlaw ang EATOF Symposium Sessions 1 ug 2 ug usa ka welcome dinner sa Cebu Provincial Capitol. Gipili sa probinsiya ang Capitol isip venue aron mahatagan ang mga delegado og higayon nga makita ang sentro sa provincial government.

Sa Sept. 3, ipahigayon ang general meeting proper, governors’ networking, governors’ conference ug press conference, lakip ang bilateral meetings tali sa mga delegado. Matud ni Canoy, ang mga bilateral meeting mahimong maghisgot sa accessibility, pagbinayloay og suporta ug mga ideya, ug uban pang hunahuna kalabot sa turismo.

Andam usab ang probinsiya sa pagdala sa mga gobernador ug heads of delegation sa mga tour aron ipakita ang lokal nga industriya ug mga produkto sa Cebu, lakip ang pagbisita kang Chocolate Queen of Cebu Raquel Choa.

Aduna usab EATOF Night nga ipahigayon isip bahin sa programa sa Sept. 3, samtang sa Sept. 4, adto ang mga delegasyon sa Argao alang sa technical tour.

Sa Argao, ipaila sa mga bisita ang mga lokal nga produkto ug ang ubang garbo sa mga lungsod ug siyudad sa Cebu. Giplano usab nga ipa-experience sa mga delegado ang hablon making isip bahin sa cultural showcase.

“Dako nig impact para ma promote ang Cebu,” matud ni Canoy, tungod sa oportunidad nga maipakita sa mga bisita ang turismo ug lokal nga mga produkto sa probinsiya.

“Atong ipakita nila kung unsa ang atong ma offer,” dugang niya, nga nagpasabot sa tumong sa probinsiya nga gamiton ang maong kalihukan sa pagpromote sa Cebu ngadto sa mga delegado gikan sa ubang rehiyon.

Gitukod niadtong 2000, ang EATOF usa ka internasyonal nga organisasyon sa mga provincial government sa East Asia nga nagtutok sa tourism development, policy exchanges ug sustainable regional growth. (BANAT NEWS)