2 mangingisda nasagip ng PCG sa Batangas
MANILA, Philippines — Dalawang mangingisda na may 20 oras na nabalahaw sa gitna ng karagatan sa Batangas noong Huwebes ang nasagip na, ayon sa Philippine Coast Guard (PCG) nitong Sabado.
Sinabi ng PCG nang pauwi na sana ang dalawa nang makaranas ng aberya sa makina ang bangkang de-motor na kanilang sinasakyan bandang alas-3:00 ng madaling-araw noong Huwebes. Hindi sila agad nakahingi ng tulong o nakapag-abiso sa kanilang pamilya dahil wala naman silang cellphone.
Dakong alas-11:30 ng gabi noong Huwebes, o mahigit 20 oras na nakatirik sa laot, namataan ng mga tauhan ng PCG ang dalawa sa dagat na sakop ng Barangay Anak Dagat sa bayan ng Lemery.
Agad na rumesponde ang mga tauhan ng PCG at nailigtas ang mga mangingisda. Sinuri naman sila ng mga barangay health worker matapos makarating sa pampang at sinabing nasa maayos silang kalusugan.
- Latest
