Mga departamento sa Cebu City ipaimbestiga

CEBU, Philippines — Giawhag ni Konsehal Jose Abellanosa ang Committee on Infrastructure nga mopahigayon og imbestigasyon batok sa Department of Engineering and Public Works (DEPW), City Engineer's Office ug uban pa’ng responsable nga opisyales human gitaho sa Commission on Audit (COA) ang kapin P432 milyones nga proyekto sa imprastraktura sa nilabay nga administrasyon nga wala makasumite og teknikal nga mga dokumento.

Gipalabang sa konseho sa Dakbayan sa Sugbo ang resolusyon nga giduso ni Abellanosa aron masuta kong aduna ba’y posibleng kapakyasan sa pagpatuman sa ilang katungdanan.

Base sa audit report sa COA, napakyas ang kagamhanan sa pagsumite sa importante nga mga dokumento sama sa Detailed Unit Price Analysis, Bill of Quantities, Breakdown of Contract Costs, Variation Orders, PERT/CPM network diagrams, ug kompleto nga aprobadong plano ug drawings.

Ang mga kuwang nga mga dokumento mao ang nakapalangay sa teknikal nga evaluation ug nakapaluya sa accountability sa paggamit sa pundo sa publiko tungod kay wala matino sa mga auditor kon makatarunganon ba ang gasto sa kontrata, kong tinuod ba ang project schedules ug husto ba ang pagsunod sa procurement procedures.

Gipahinumduman ni Abellanosa ang konseho nga nakapadala na ang COA og pormal nga hangyo sa DEPW niadtong Agosto 2025 ug Marso 2026 apan wala gihapon kini matubag hangtud sa paghuman sa audit report.

Human giaprobahan ang resolusyon, naghimo ang tsirman sa Committee on Infrastructure nga si Konsehal Edgardo “Jaypee” Labella II og corollary motion aron obligahon ang DEPW, City Engineer, chairman sa Bids and Awards Committee, City Accountant, ug City Budget Office sa pagsumite sa tanang adunay kalabotan nga record ug ilang internal findings kabahin sa mga proyekto nga gilista sa COA. Sa laing corollary motion, gihangyo sa tsirman sa Committee on Laws Councilor Mikel Rama nga i-refer ang resolusyon sa iyang komite alang sa legal nga pagtuon.

Base sa ulahing Annual Audit Report sa COA, giingong 47 ka infrastructure projects nga nagkantidad og P432,995,270.64 ang wala mapaubos og evaluation tungod sa kakuwang sa mga dokumentong gikinahanglan ubos sa COA Circular No. 2009-001. — Caecent N. Magsumbol, BDB BANAT NEWS