Gunners, Venom Vipers nakasagunson og daog

CEBU, Philippines — Ang Gunners ug ang Venom Vipers miligid sa ikaduha nilang sunod-sunod nga daog sa D'Generals Basketball League Season 4: Camaraderie Cup sa Aulga Citi Sports aa Barangay Lawaan II, dakbayan sa Talisay.

Ang Gunners milampaso sa Go Hard, 97-69, samtang ang Vipers 2-0 na sab human gipatilaw og pildi Lightsout, 91-80.

Si Nathaniel Gudito mipaulbo og 27 puntos uban ang upat ka rebounds ug duha ka assists alang sa Gunners aron mamahimong  Sunsport Best Player of the Game.

Si Gudito gisuportaan ni  Michael Nicole Tabanas nga mihipos og 19 puntos, pito ka rebounds ug tulo ka assists.

Sa laing bahin, si Alloy Sayson mipatuasik og 41 puntos uban ang pito ka  rebounds ug upat ka assists alang sa Vipers.

Nanghugyaw sab si Roy Daclan sa Vipers bitbit ang 14 puntos, siyam ka rebounds, ug tulo ka assists.

Sa ubang mga resulta, ang Mix Hoopers ug Still&Motion parehong miinat sa ilang baraha ngadto sa 2-1 human gipayaka ang tagsa-tagsa nila ka mga kontra.

Ang Mix Hoopers milatigo sa Iron Bull, 77-59, samtang ang  Still&Motion nakaipsot sa  Brotherhood,  76-75.

Si William Barbosa maoy nangu sa Mix Hoopers uban ang 18 puntos, upat ka rebounds, ug unom ka assists aron sakmiton ang pasidungog isip Shoe-Ice Best Player of the Game.

Dako sab og naambag si Ken   Laraga nga mikimada og 13 puntos, pito ka rebounds, ug upat ka assists.

  Si Herjon Daan ang bida  sa Still&Motion uban ang 16 puntos,  walo ka rebounds ug upat ka assists. Si Leoben Dequilla miamot og 14 puntos, unom ka rebounds, ug duha ka assists.