Grade 9 student nahulihan ng .357 baril sa loob ng paaralan

MANILA, Philippines — Isang 14-anyos na Grade 9 student ang nahulihan ng walang balang .357 Smith & Wesson Magnum revolver sa kanyang bag sa loob ng Lut-od National High School sa bayan ng Pinamungajan, Cebu, noong hapon ng Huwebes, Agosto 20, 2026.

Batay sa ulat, alas-3:50 ng hapon ay nagsasagawa ng isang surprise bag ins­pection bilang bahagi ng safety measures ng paaralan ang guro at dito ay na­dis­kubre ng guro ang baril sa bag ng estudyante.

Ayon sa inisyal na im­bestigasyon ng Cebu Police Provincial Office (CPPO), ang armas ay pagmamay-ari umano ng lolo ng estudyante na kinuha nito sa isang kabinet sa kanilang bahay sa Purok Santol, Barangay Lut-od nang walang pahintulot.

Ang bata ay kasaluku­yang nakatira sa kanyang mga lolo at lola dahil ang kanyang mga magulang ay nagtatrabaho sa labas ng bayan.

Agad na nakipag-ugna­yan ang pamunuan ng eskwelahan sa lokal na kapulisan upang i-turnover at i-dokumento ang nakum­piskang armas.

Dahil ang sangkot ay isang menor de edad, ang estudyante ay dinala at ipinasakamay sa Municipal Social Welfare and Deve­lopment Office (MSWDO) habang­ inaantay ang pagdating ng kanyang mga magulang o guardian, alinsunod sa mga patakaran ng Juvenile Justice and Welfare Act.

Patuloy pa ring imbes­tigahan ng mga otoridad ang insidente upang malaman ang mas malalim na dahilan kung bakit dinala ng bata ang baril sa klase.