Lugar nga tokuran sa building sa MCC ug CTU gihawanan
CEBU, Philippines — Gisugdan na ang site clearing alang sa giplanong mga building sa Mandaue City College (MCC) ug Cebu Technological University (CTU) sa Norkis Park samtang nangandam ang siyudad alang sa Phase 1 sa proyekto.
Lakip sa proyekto ang walo ka andana nga building alang sa MCC ug tulo ka andana nga building alang sa CTU.
Si Mandaue City Mayor Thadeo “Jonkie” Ouano, kauban si Rep. Emmarie “Lolypop” Ouano-Dizon, mibisita sa project site kauban ang mga arkitekto, engineer ug mga opisyal sa CTU niadtong Miyerkules, Agosto 19, aron hisgutan ang mga kinahanglanon ug proseso nga kinahanglan mahuman sa dili pa magsugod ang construction.
Gisusi usab nila ang kasamtangang kahimtang sa lugar ug ang mga lakang nga gikinahanglan aron masiguro ang hapsay nga pagpatuman sa unang hugna sa proyekto.
Ang City Engineer’s Office ug City Planning and Development Office maoy motan-aw sa progreso sa proyekto ug sa pagsunod niini sa mga kinahanglanon sa construction.
Matud sa mga opisyal sa siyudad, gilauman nga magamit na sa mga estudyante ang ubos nga mga andana sa building samtang nagpadayon pa ang construction sa ubang bahin, aron mas sayo magamit ang mga pasilidad.
Mitambong usab sa diskusyon si City Administrator Atty. Gonzalo “Sally” Malig-on Jr., City Disaster Risk Reduction and Management Office Head Buddy Alain Ybañez, ug mga opisyal gikan sa Department of Public Works and Highways 6th District Engineering Office.
Gilauman nga makadugang ang proyekto og mga learning spaces ug pasilidad alang sa mga estudyante sa MCC ug CTU. Ang bag-ong MCC building usa sa mga priority project ni Ouano, kauban sa giplanong modernong city hospital. (BANAT NEWS)
- Latest
