Mga eskuylahan pabutangag tanod outpost
CEBU, Philippines — Ang Department of the Interior and Local Government (DILG) naglaraw nga pabutangan og barangay tanod outpost sulod sa mga eskwelahan isip dugang nga security measure alang sa mga estudyante.
Sa press briefing sa Camp Crame niadtong Miyerkules, Agosto 19, gipahayag ni DILG Secretary Jonvic Remulla nga kabahin kini sa memorandum circular nga ilang pirmahan uban sa Department of Education (DepEd) aron mapalig-on ang seguridad sa mga estudyante.
Gipasabot ni Remulla nga pamilyar ang mga barangay tanod sa mga estudyante sa ilang lugar ug mahimong makig-estorya ug makapahimangno kanila isip kabahin sa dugang nga security measure.
Naa nay memorandum circular ang DILG nga nagmando sa Philippine National Police (PNP) nga magmentinar sa seguridad sa perimeter sa mga eskwelahan, apan diha ra sila sa gawas nga gikonsiderar man ang mga eskuylahan nga “zones of peace.”
Kaning sugyot sa DILG may koneksyon ni sa nahitabo niadtong Agosto 18 sa Ateneo de Zamboanga University Junior High School, diin usa ka Grade 10 student ang gikatahong gipusil ug namatay sa usa ka Grade 9 student ang suspek kinsa gikataho nga nagpakamatay pud.
Sa pikas bahin, naglaraw ang Mandaue City nga mag-instalar og walk-through ug handheld detection metal detectors sa mga ganghaan sa mga pangpublikong eskuylahan sa dakbayan. (BANAT NEWS)
- Latest
