Tinun-an gisuwayan pagpusil, suspek nadakpan dayun

CEBU, Philippines — Gisuspenso ang face-to-face classes sa Don Vicente Rama High School ug Don Vicente Rama Elementary School sa Cebu City kagahapong adlawa Huwebes, Agosto 20, 2026, human sa insidenteng pagpasalba sa gawas sa eskwelahan sa Barangay Basak San Nicolas niadtong Miyerkules sa gabii.

Nahitabo ang maong insidente sa Cabreros St. corner L. Gabuya St., Barangay Basak San Nicolas, Cebu City.

Nadakpan hinuon dayun sa mga sakop sa Mambaling Police Station sa Cebu City Police Office ang 21-anyos nga lalaki nga giila sa alyas nga Adrian,  taga Barangay Basak San Nicolas.

Base sa imbestigasyon sa kapulisan, gipabuthan sa suspek ang usa ka 17-anyos nga tinun-ang  naghulat sa iyang mga kaubang nagtungha sa maong eskwelahan.

Apan maayo nalang nga nakahupo kini ug wala maigo. Daling nangabot ang kapulisan ug gidakop ang suspek ug nakuha gikan niya ang usa ka .38-caliber revolver nga adunay tulo ka bala ug usa ka basiyo.

Giangkon sa suspek ang iyang gibuhat kay gusto daw siyang manimalos para sa iyang 14-anyos nga ig-agaw nga giingong gidunggab sa maong 17-anyos nga estudyante atong miaging buwan. Apan kagahapon, nitumaw na sab ang estorya nga naa pay laing estudyante nga posibleng pusilon maong gikanselar nalang ang klase.

Sa report sa kapulisan, ang pusilon unta niya nga estudyante sakop og fraternity nga naghuwat sa iyang mga kauban nga nagtungha sa maong tunghaan.

Apan gipanghimakak sa suspek nga duna siya'y planong dautan sa mga tinun-an ug dili siya ang nagpagawas anang estoryang naa pay laing pusilon nga estudyante.

Gihangyo ni Konsehal Dave Tumulak ang publiko nga dili pataka’g pakatap og mga text or chat messages nga makahatag og kalisang sa publiko ilabi na og dili beripikado sa awtoridad.

Gihangyo sab niya ang mga ginikanan nga estoryahon ilang mga anak kung duna bay mga gapanghulga kanila ug kung naa, kinahanglang i-report kini sa mga otoridad aron maatiman ug dili ipaagi sa social media nga dili na hinuon mamao ang pagsabot.

NAGDALA’G ARMAS

Kagahapong adlawa sab, usa ka 14-anyos nga estudyante sa Lut-od National High School sa Barangay Lut-od sa Pinamungajan ang gidakop kay nagdala kini og .357 Smith & Wesson Magnum revolver sulod sa iyang school bag.

Nasakpan ni sa iyaha mismong magtutudlo nga kalit nga nihimo og surprise bag inspection atol sa ilang klase.

Nasuta hinuon nga walay bala ang armas. Ang estudyante nitug-an sa mga polis nga iyang gikuha ang tinagoang pusil sa kabinet sa iyang apohan  ug iyaha kining gidala sa eskuylahan.

Ang menor de edad gitugyan na ngadto sa social welfare office sa munisipyo subay sa tukmang proseso.

“This incident demonstrates the importance of vigilance and proactive safety measures inside our schools. We commend the school personnel for immediately reporting the discovery and seeking police assistance. Their prompt action helped ensure that the situation was contained before it could potentially lead to harm,” matud pang Cebu Police Provincial Office Provincial Director Police Colonel Abubakar Udang Mangelen Jr. —Shiela Mae Agrabio, Romeo Marantal (BANAT NEWS)