Mexicans lusot sa Pinay cagers

MANILA, Philippines — Isinuko ng World No. 30 Gilas Pilipinas Women ang hawak na 15-point lead sa second quarter patungo sa 58-61 kabiguan sa No. 31 Mexico sa pagdribol ng FIBA Women’s Olympic Pre-Qualifying Tournament 2026 kahapon sa Arena Astros sa Guadalajara, Mexico.

Hinugot ni point guard Vanessa De Jesus ang 13 sa kanyang 15 points sa first half para banderahan ang mga Pinay cagers.

Nagdagdag si center Jack Animam ng 14 markers, habang may tig-walong puntos sina Gabby Dela Rosa at Sophia Dignadice para sa tropa ni Canadian coach Burke “BT” Toews.

Pipilitin ng Nationals na makabawi sa pagharap sa No. 7 Canada bukas ng alas-7:30 ng umaga.

Sa likod nina De Jesus, Animam at Kacey Dela Rosa ay inilista ng Gilas Women ang malaking 35-20 lead sa second quarter.

Ngunit unti-unti itong natapyas ng mga Mexicans para makalapit sa 39-43 sa third period.

Muling nakalayo ang Gilas Women sa likod nina Jhazmin Joson at Dignadice bago umarangkada ang Mexico para agawin ang 59-57 bentahe sa dulo ng fourth canto.