Garcia nisugyot og roll back sa mga buhis

CEBU, Philippines — Gisugyot ni kanhi kongresista Pablo John “PJ” Garcia ang pag-roll back sa mga buhis ug bayranan nga gipahamtang sa Cebu Provincial Government nga matud niya makahatag og mas lapad nga ayuda sa taxpayers taliwala sa taas nga presyo sa mga palaliton.

Si Garcia nisugyot sa province-wide rollback sa real property tax, transfer tax ug sand and gravel fees.

 Gihulagway niya kini isip ayuda nga walay pili, ayuda nga dili linyahan o tabang nga dili limitado sa pipila lang ka benepisyaryo.

Sa usa ka sit-down interview nga iyang gi-post sa iyang personal nga blog, matud ni Garcia nga ang pagpaubos sa buhis makahatag og mas lapad nga kahupayan kompara sa mga ayuda nga ipanghatag ngadto sa piniling mga indibidwal o sektor.

Iyang gikutlo ang inflation figures nga nagpakita nga nikunhod sa 12.4 porsyento ang inflation sa Cebu gikan sa 13.6 porsyento niadtong Mayo.

Sa Cebu City, nikunhod usab kini ngadto sa 13.7 porsyento gikan sa 16.1 porsyento.

“These are still painful numbers. The price of rice is steep. Fuel keeps getting pricier. These are the things that truly affect ordinary families every single day”, padayag ni Garcia.

Gikwestiyon ni Garcia ang plano sa provincial government nga hatagan og P1 bilyon nga tax discount ang Apo Cement diin matud usab niya nga ang susamang tax relief ang kinahanglan usab nga maabot ngadto sa ubang taxpayers.

“If we can give a billion in tax relief to a single corporation, then we should be rolling back tax rates for all Cebuanos”, ni Garcia pa.

Gisugyot usab ni Garcia nga ibalik sa pre-pandemic levels ang real property tax rates nga makabilin og dugang kwarta sa mga panimalay alang sa pagkaon, gasolina ug uban pa’ng panginahanglanon.

Gihisgotan ni Garcia ang sand and gravel fees nga giingong adunay epekto sa gasto sa construction sa mga negosyo ug ordinaryong mga pamilya nga nagtukod o nagpaayo sa ilang mga balay.

Si Garcia nagkanayon nga dili lang angay tan-awon isip nawala nga kita sa gobiyerno ang tax rollback apan isip kwarta nga mobalik sa lokal nga ekonomiya.

“Mao ni ang akong i-lobby kay kini ang ayuda nga dili mamili ug dili kinahanglan linyahan, pero makatabang sa kadaghanan”, dugang ni Garcia. (BANAT NEWS)