LTO niluwat og show cause order batok sa drayber sa PUJ

CEBU, Philippines — Ang Land Transportation Office (LTO)-7 niluwat og show cause order batok sa usa ka drayber sa public utility jeepney (PUJ) nga giingong nalambigit sa insidente sa reckless driving diha sa dalan Colon, Dakbayan sa Sugbo niadtong Agosto 11, 2026.

Ang mando nga giluwatan ni LTO-7 Director Wendel Dinglasan nipaila sa drayber nga si Celestino Endrina Damasole kinsa nagmaneho sa Mitsubishi L300 Jitney/PUJ nga adunay plate number nga 055CCE.

Matud sa mga record nga gihisgotan sa LTO ilabina sa report sa Cebu City Police Office-Traffic Enforcement Unit giingong napakyas si Damasole sa pagkontrolar sa sakyanan pasado alas 3:40 sa hapon sa nahisgutang adlaw hinungdan nga nisutoy kini ug nabangga ang likod nga bahin sa mga motorsiklo nga nagbiyahe sa samang direksyon.

Ang maong bangga giingong niresulta sa pagkaangol sa mga nalambigit ug pagkadaot sa kabtangan.

Giimbestigahan sa Cebu City Police Office ang insidente ug gi-report kini isip reckless driving.

Gimandoan si Damasole nga motunga diha sa LTO-7 Operations Division sulod sa lima ka adlaw gikan sa iyang pagkadawat sa show cause order ug mosumite og verified o sworn comment o explanation lakip ang mga dokumento ug uban pa’ng ebidensiya aron iyang matubag ang mga alegasyon.

 Matud ni Dinglasan nga kinahanglang ipasabot sa drayber nganong dili siya angay kasohan og administratibo tungod sa reckless driving ubos sa Section 48 sa Akta Republika No. 4136 kun “Land Transportation and Traffic Code” ug nganong dili suspendihon o bawi-on ang iyang driver’s license.

Samtang wala pa masulbad ang administratibong kaso, preventively suspended sulod sa 90 ka adlaw ang driver’s license ni Damasole ug gibutang kini ubos sa alarm.

Gimandoan usab siya nga itugyan ang iyang driver’s license sa iyang pagkadawat sa mando.

Gibutang usab ubos sa alarm ang Mitsubishi L300 Jitney/PUJ nga adunay plate number 055CCE samtang gihulat ang pinal nga resolusyon sa kaso.

Matud usab ni Dinglasan nga mahimong magpa-assist si Damasole og counsel nga iyang pilion atol sa proceedings.

Dugang ni Dinglasan nga kong mapakyas ang drayber sa pagtunga ug pagsumite sa gikinahanglang sinulat nga explanation isipon kini nga waiver sa iyang katungod nga madungog ug ang kaso desisyonan base sa mga ebidensiya nga anaa sa LTO. (BANAT NEWS)