118 ka health workers sa probinsiya na regular

CEBU, Philippines — Gipaspasan sa administrasyon ni Gobernador Pamela Baricuatro ang pagpalig-on sa healthcare workforce sa probinsiya human 118 ka health workers sa mga ospital nga gidumala sa Cebu Provincial Government ang nakadawat og plantilla appointments.

Nanumpa ug pormal nga nadawat ang ilang appointments atol sa seremonyas nga gihimo alas-3 sa hapon niadtong Lunes sa Cebu Provincial Hospital (CPH) sa Balamban.

Sa 118 ka workers, 97 ang gikan sa job order (JO) status nga na-regular, samtang 19 ang mga permanent employees nga na-promote ngadto sa mas taas nga posisyon.

Ang pinakadaghan sa mga na-appoint naggikan sa CPH-Balamban nga adunay 100 ka workers. Gisundan kini sa CPH-Carcar nga adunay siyam, CPH-Danao nga pito, samtang tagsa gikan sa Bantayan District Hospital ug Ricardo L. Maningo Memorial Hospital sa San Francisco, Camotes.

Gihulagway ni Dr. Nikki Catalan ang maong seremonyas isip usa ka makasaysayanong kalihokan tungod kay kini ang unang higayon sulod sa 41 ka tuig nga gihimo ang en masse oath-taking alang sa mga health workers sa provincial hospitals.Matud ni Catalan, kabahin kini sa commitment ni Baricuatro nga palig-onon ang healthcare services sa probinsya ug hatagan og mas lig-on nga kahimtang ang mga nagserbisyo sa mga ospital sa probinsiya.

Gilauman nga pinaagi sa regularization, mahatagan og mas dakong seguridad ug stability ang mga workers, ilabi na kadtong dugay nang nagserbisyo isip job order ug wala pa makabaton og permanenteng appointment.

Lakip sa na-regular ang 49-anyos nga si Rubylyn Dumdum, usa ka cook sa ospital nga nagserbisyo sukad pa niadtong 2009. Dako ang iyang kalipay tungod kay human sa daghang tuig, nakabaton na siya og regular nga posisyon.

Matud niya, dako usab nga kahupayan alang kaniya ang oportunidad nga makaabot sa pension. Adunay tulo ka anak si Dumdum ug miingon nga kaniadto mokabat lamang sa P11,000 ngadto sa P12,000 ang iyang sweldo, samtang mokabat na karon sa P17,000 isip regular employee.

Usa usab sa na-regular si 36-anyos Angel Mae Apduhan, usa ka nurse nga 13 na ka tuig nga nagserbisyo. Miangkon siya nga adunay mga higayon nga gusto na siyang mohawa, apan nagpabilin siya tungod sa iyang pagserbisyo sa katawhan ug alang usab sa iyang anak.

Gikan sa unang sweldo nga P17,000, anaa na karon sa P43,000 ang iyang sweldo isip Nurse II. Matud niya, ang pagserbisyo sa mga tawo sa ilang lugar usa sa mga hinungdan nganong mipadayon siya sa trabaho.

Sa iyang mensahe, gipasalamatan ni Baricuatro ang mga health workers sa ilang mga tuig nga pagserbisyo ug giawhag sila nga magpadayon sa pagtabang sa administrasyon sa paghatag og serbisyo sa mga Cebuanos.

“I’m truly really grateful to the service you have rendered to the public,” matud ni Baricuatro. (BANAT NEWS)