Runner sa fun run, nadasmagag awto
CEBU, Philippines — Naangol ang usa ka 18-anyos nga runner human kini nabanggaan sa usa ka Honda Civic nga gimaneho sa 21-anyos nga lalaki sa Archbishop Reyes Avenue, dapit sa TESDA flyover sa Barangay Lahug, Cebu City, sayong buntag niadtong Agosto 15, 2026.
Ang biktima mao si alyas Mary, 18 anyos, nga niapil sa St. Ignatius Run ug nagdagan sa maong dalan atol sa insidente.
Ang drayber sa Honda Civic nga si Alfred , 21 anyos, giingong mi-swerve paingon sa tuo aron malikayan ang usa ka sakyanan nga nag-una kaniya.
Apan atol sa maong maniobra, nabanggaan ang runner hinungdan nga natumba kini sa karsada ug naangol.
Girespondehan dayon sa ambulance ang insidente ug gidala ang biktima ngadto sa Chong Hua Hospital alang sa pagtambal.
Samtang, gidala usab ang drayber sa Cebu City Medical Center alang sa Field Sobriety Test.
Gidala siya sa kustodiya sa kapolisan ug giatubang ang kaso may kalabotan sa Reckless Imprudence Resulting in Physical Injury, subay sa Section 48 sa Republic Act 4136 o Land Transportation and Traffic Code.
Padayon ang imbestigasyon sa Traffic Enforcement Unit sa Cebu City Police Office. — /IBM (BANAT NEWS)
- Latest
