Dakong drainage tukoron diha sa Highway Tagunol

CEBU, Philippines — Dakong drainage ang tukoron diha sa Highway Tagunol, Dakbayan sa Sugbo karong tuiga human nihatag og pundo ang Department of Public Works and Highways (DPWH).

Tumong niini ang pagpaayo sa agianan sa tubig ug pagpamenos sa pagbaha nga masinati sa mga residente ug mga motorista nga moagi sa Highway Tagunol ug sa mga barangay sa palibot niini.

Matud ni Konsehal Dave Tumulak nahisgotan sa ilang panagtigom kauban si Executive Secretary Ralph Recto ug Congressman Eduardo Rama ang paghatag og pundo gikan sa DPWH alang sa maong proyekto human nibisita si Secretary Vince Dizon sa niaging semana.

Gisusi ni Dizon ang mga lugar nga kanunay’ng bahaan lakip ang Kinasang-an ug Basak Pardo.

 Gitan-aw usab niini ang mga kinahanglanon sa flood control ug drainage project sa maong mga dapit.

Matud ni Tumulak nga gibana-bana’ng nikabat sa kapin sa P200 milyones ang pundo nga gigahin sa DPWH alang sa proyekto.

Sakop sa tukoran og drainage o kanal ang Basak San Nicolas, Highway Tagunol, hangtud diha dapit sa L. Gabuya Street mahimong agianan sa tubig gikan sa lima ka barangay padulong sa Barangay Basak Pardo.

Gipasabot ni Tumulak nga importante ang proyekto tungod sa problema sa pag-awas sa tubig ilabina panahon nga mouwan nga usahay moresulta sa pagbaha sa Highway Tagunol ug makapalisod sa pag-agi sa mga sakyanan ug mga tawo.

Ang proyekto gikatahong sugdan karong tuiga tungod kay naabot na sa panudlanan sa kagamhanan sa siyudad ang pundo.

Gilaoman ni Tumulak nga masugdan ug mahuman kini karong tuiga aron wala na’y magpundo nga tubig ug paspas na ang pagpahubas sa tubig-baha. — /BDB (BANAT NEWS)