Camotes mo-host sa national age group triathlon series

CEBU, Philippines — Mahitabo og balik ang usa ka dakong triathlon event didto sa isla sa Camotes uban sa pagpahigayon sa 2026 National Age Group Triathlon Series karong Oktubre 24-25.

Gipresenta sa Philippine Sports Commission (PSC) ug Triathlon Philippines inabagan sa probinsiyal nga kagamhanan sa Sugbo ubos sa pagpangu ni gobernador Pamela Baricuatro, Cebu Provincial Sports Commission nga gipangulohan ni chasirman Dr. Rhoel Dejaño ug sa lokal nga kagamhanan sa San Francisco, Poro, ug Tudela sa Camotes, ang duha ka adlaw nga aksiyon mosikad sa Oktubre 24 uban ang National Age Group Duathlon sa alas-6 sa buntag didto sa Tudela ug Poro.

Pagasundan kini sa National Age Group Aquathlon sa alas-3 sa hapon didto sa Santiago Bay sa San Fran.

Ang kulbahinam nga lumba matapos pinaagi sa National Age Group Triathlon sa Oktubre 25 sa alas-6 sa buntag

didto sa Santiago Bay.

Mga kategoriya nga kumbatihan sa makutas nga karera mao ang Elite, Junior Elite, Youth/U15, Super Trikids, ug Age Group.

Gawas sa kompetisyon, ang Camotes leg nagsuporta sa mga programa sa Triathlon Philippines, nga naghatag sa mga batan-ong atleta og bililhong kasinatian sa lumba ingon man plataporma aron madiskobrehan ang ilang talento.

“Bringing the National Age Group Triathlon Series to Camotes Island is about more than staging races. It is about creating opportunities for young athletes, discovering future champions, and building a clear pathway for their development as we prepare for the 2027 Southeast Asia Plus Youth Games,” matud pa ni Triathlon Philippines President Tom Carrasco Jr.

Kining kalihukan nakatampo sab sa mga inisyatiba ni Baricuatro ug PSC sa alang sa kalamboan sa mga kabatan-onan ug turismo pinaagi sa paugnat sa kusog.