Mga board passers gihatagan og cash incentive

CEBU, Philippines — Di momenos 78 ka Oponganon nga nakapasar sa ilang tagsa-tagsa ka professional licensure examinations ang nakadawat og P5,000 nga cash incentive matag usa gikan sa Lapu-Lapu City Government.

Ang mga benepisyaryo mao ang ikaduhang batch sa mga board passers nga giila ubos sa City Ordinance No. 14-095-2017, o ang Lapu-Lapu City Board Passers Incentives Program.Giila usab sa siyudad ang tulo ka Oponganon nga topnotchers nga nanguna sa ilang tagsa-tagsa ka licensure examinations.

Si John V. Labrador nanguna sa April 2026 Registered Electrical Engineers Licensure Examination human makakuha og rating nga 94.25 porsyento.

Si Je C. Ycong nahimutang sa ikaupat sa April 2026 Real Estate Broker Licensure Examination nga adunay rating nga 92.25 porsyento, samtang si Arvin C. Ruiz ikalima nga pwesto sa March 2026 Licensure Examination for Teachers nga adunay rating nga 94.20 porsyento. Ang tulo ka topnotchers nakadawat og P60,000 matag usa ubos sa insentibo sa siyudad.

Si Labrador unta makadawat og P100,000 nga insentibo tungod sa iyang unang pwesto. Apan nakit-an nga dili siya kwalipikado sa opisyal nga insentibo human gipakita sa records nga dili siya aktibong botante ug wala makabotar sa miaging duha ka eleksyon.

Usa sa mga requirement sa opisyal nga insentibo mao ang Voter’s Certificate. Bisan pa niini, personal nga gihatagan ni Mayor Ma. Cynthia “Cindi” King-Chan ug Congressman Junard “Ahong” Chan si Labrador og P50,000 nga token isip pag-ila sa iyang nahimo.

Human sa pag-ila sa ikaduhang batch, mokabat na sa 156 ka Oponganong board passers ang giila sa city government.