Pinoy cagers ‘di umubra sa mga Aussies
MANILA, Philippines — Hindi umubra ang determinasyon ng Gilas Pilipinas Boys matapos ang 69-107 kabiguan sa nagdedepensang Australia sa 2026 FIBA U18 Asian Championships kahapon sa Veer Savarkar Indoor Stadium sa Ahmedabad, India.
Bigo ang mga Pinoy cagers na maduplika ang naunang 89-88 paglusot sa Chinese Taipei at nahulog sa 1-1 record sa Group A sa ilalim ng 2-0 marka ng mga Aussie dribblers.
Pinamunuan ni George Aidan Green ang Gilas Boys sa kanyang 12 points kasunod ang 10 markers ni Luke Atacador at may tig-siyam na puntos sina Elias Gish, JB Cagurungan at Andrew Chio.
Idinikit ni Sizco Roquid ang Nationals sa 24-26 sa pagbubukas ng second quarter kasunod ang inihulog na 13-0 bomba ng Australia para lumayo sa 39-24.
Isinara ng mga Aussies ang first half bitbit ang 56-34 kalamangan patungo sa pagbaon sa Gilas Boys sa 107-65 mula sa dalawang free throws ni Isaac Riddle sa huling 57 segundo ng laro.
Pipilitin ng Gilas Boys na makabangon sa pagsagupa sa Thailand bukas ng alas-4 ng hapon.
Umiskor si Yahya Basaran ng 17 markers para sa Australia kasunod ang 16 markers ni John Aryang.
- Latest
