Lebel sa tubig sa Jaclupan Dam misaka

CEBU, Philippines — Adunay pag-usbaw sa suplay sa tubig gikan sa Jaclupan Water Facility sa Metropolitan Cebu Water District (MCWD) tungod sa pag-uwan-uwan nga nasinati na Sugbo sa nanglabay nga mga adlaw.

Sumala pa ni MCWD General Manager John DX Lapid nga ang Jaclupan dam nagpagawas na og 24,000 cubic meters nga tubig matag adlaw kun diin mas maayo kini kung itandi sa kahimtang niadtong Hunyo 2026 diin nitaho ang MCWD nga adunay pagkunhod sa suplay nga milapas na og 16,000 cubic meters lang matag adlaw.

Bisan pa sa pag-uswag sa suplay, mipasidaan ang MCWD nga posibleng moabot ang mas grabeng epekto sa El Niño o huwaw sa ulahing bahin karong tuiga.

Sumala sa briefing nga ilang nadawat gikan sa Philippine Atmospheric, Geophysical and Astronomical Services Administration (PAGASA), gilauman pa ang pag-uwan-uwan hangtud sa Septiyembre ug Oktubre, apan mahimong mokunhod ang pag-uwan sa pagsugod sa Nobiyembre ug Disyembre.

Gibutyag usab ni Lapid nga kasamtangang nasinati sa Sugbo ang moderate El Niño ug gilauman nga mosamot pa kini sa mosunod nga mga buwan.

Tungod kay nisaka ang suplay sa tubig sa pagkakaron, padayon ang MCWD sa paghatag og mas taas nga produksyon gikan sa Jaclupan aron matubag ang panginahanglan sa mga konsumidor.

Gitubag usab ni Lapid ang mga taho adunay pagkunhod sa tubig matag higayon nga mag-uwan. Matud pa ni Lapid nga dili direktang konektado ang uwan sa tubo sa mga konsumidor tungod kay groundwater source ang Jaclupan dam.

Gipasabot ni Lapid nga ang tubig nga mogawas sa mga tubo sa mga konsumidor moagi pa og proseso. Ang tubig gikan sa sapa nga moabot sa aquifer, kinahanglan nga maproseso ug i-treat aron nga limpyo nga maabot sa mga konsumidor.

Mahitungod sa mga reklamo gikan sa Barangay Kaputhaw nga hinay ang agas sa tubig, mitubag sab si Lapid nga ang ilang suplay nagagikan sa kombinasyon sa deep well ug JE Hydro.

Posible usab nga naapektuhan kini sa rotational brownout o sa dakong leakage nga nahitabo niadtong Agosto 7 sa Salinas Drive sa Barangay Lahug.

Giklaro sab ni Lapid nga dili tinuod nga “sinkhole” ang nahitabong insidente kondili usa lamang ka cave-in nga mahimong nakaapekto sa sistema sa tubig sa maong lugar.

Bisan pa sa mga hagit nga posibleng dala sa El Niño, gipasalig sa MCWD nga padayon silang nagmonitor sa kahimtang sa suplay aron masiguro nga adunay igo nga tubig ang mga residente sa Metro Cebu. (BANAT NEWS)