Fetus gibilin sa kanal sa Paknaan
CEBU, Philippines — Napalgan ang usa ka fetus sa kanal sa Zone Sayote, Barangay Paknaan, Dakbayan sa Mandaue, pasado alas 3:00 sa kaadlawon niadtong Biyernes, Agosto 14, 2026.
Giimbestigahan karon sa Mandaue City Police Office (MCPO) ang pagkakaplag sa maong fetus human maalerto ang MCPO Command Center alas 7:00 sa buntag bahin sa insidente.
Matud sa report, usa ka residente sa maong lugar ang unang nakamatikod sa us aka plastic bag diha sa kanal alas 3:00 sa kaadlawon.
Sa dihang nihayag na gibalikan niini ang maong kanal aron pagsusi kung unsa kadto nga puting plastic bag ug didto niya nadiskubrehan nga fetus diay ang sulod niini.
Dali niyang gikontak ang Barangay Paknaan Public Emergency Response Team ug gipadala ang ambulansya ngadto sa lugar.
Nagpadala sab ang kapolisan og Scene of the Crime Operatives (SOCO) aron sa pagproseso sa crime scene, dokumentasyon, eksaminasyon ug pagkolekta sa mga ebidensya aron makatabang sa pagtino sa mga sirkumstansya sa maong insidente.
Matud ni Police Colonel Cirilo Acosta, City Police Director sa MCPO, padayong gihimo sa kapulisan ang lawom nga imbestigasyon aron pagsubay kun kinsa ang naglabay sa maong fetus. (BANAT NEWS)
- Latest
