Science Discovery Center gibuksan sa Minglanilla, Cebu

CEBU, Philippines — Giablihan na sa publiko ang Science Discovery Center sa Minglanilla, Cebu, nga naghatag og bag-ong lugar alang sa mga estudyante, magtutudlo, pamilya ug ubang bisita aron mas masabtan ang siyensya pinaagi sa interactive exhibits ug hands-on nga mga kalihokan.

Ang Science Discovery Center usa ka hiniusang proyekto sa Department of Science and Technology (DOST)-Central Visayas ug usa ka theme park sa lungsod sa Minglanilla.

Mitampo ang DOST pinaagi sa technology interventions, lakip ang paghatag og interactive science and technology exhibits nga gibutang sa Center, ingon man access sa DOST-STARBOOKS, ang digital science and technology library sa ahensya.

Lakip sa mga pasilidad ang Game Room nga adunay Laser Maze ug Hide-and-Seek, ingon man Natural Hazards Exhibit nga adunay cyclone, whirlpool ug Feel-the-Shake earthquake simulator.

Aduna usab kini mga table-top exhibits sama sa Van de Graaff Generator, Heartbeat Sensor, Emotion Stabilizer, Vertical Lightning Ball, Water Defying Gravity, Chaotic Pendulum, Resonant Pendulum, Tug-of-War, Uphill Roller, Momentum Machine, Myopia and Hyperopia, Tesla Coil, Optical Fiber, Optical Tri-Color, Jacob’s Ladder, Gravity Bubble Machine ug Bernoulli Blower.

Pinaagi niini, ang mga bisita makasinati og simulated earthquake, makakita kung giunsa pagporma ang cyclone ug whirlpool, ug makakat-on bahin sa static electricity, light, motion, gravity, momentum, vision ug airflow.

Gibutangan usab og QR codes ang mga exhibit diin ang mga estudyante makasulbad og trivia questions nga may kalabotan sa scientific concepts nga ilang nasinate. Ang mga pangutana gipahiuyon sa MATATAG Curriculum aron masumpay ang interactive activities sa mga leksyon nga gitudlo sa mga eskwelahan.

Makagamit usab ang mga estudyante ug magtutudlo sa DOST-STARBOOKS alang sa dugang nga science and technology learning materials ug references.

Kapin 1,000 na ka confirmed bookings ang natala alang sa Science Discovery Center, nga nagpakita sa interes sa mga eskwelahan ug pamilya sa bag-ong learning facility.

Ang inisyatiba kabahin sa paningkamot sa DOST nga mas mapaduol sa mga batan-on ang siyensya ug teknolohiya pinaagi sa direktang kasinatian ug interactive learning.

Ang Science Discovery Center midugang usab og educational component sa 1.5-hectare family entertainment facility sa Minglanilla, nga adunay mga themed zones, rides ug uban pang attractions. (BANAT NEWS)