Cebu City collegiate invitational basketball

CEBU, Philippines — Ang Jose Rizal University (JRU) Heavy Bombers mikumpleto sa way pildi nilang ratsada uban ang 85-64 nga demolisyon sa University of Cebu (UC) Webmasters sa final aron langkaton ang korona sa kampiyonato sa Cebu City Collegiate Invitational Basketball Tournament 2026 niadtong Martes sa gabii, Agosto 11, sa Cebu City Sports Institute sa Barangay Calero.

Si Christopher Jubilla mipabuto og 20 puntos uban ang walo ka rebounds, usa ka assist ug duha ka steals samtang ang Sugbuanong guard nga si Lawrence Mangubat midugang og 14 puntos, usa ka rebound, tulo ka assists, ug usa ka steal alang sa bisitang NCAA team, nga mibulsa og P130,000 sa pagdominar nila ning unom ka adlaw nga torneyo bitbit ang perpektong 5-0 rekord.

Nagparamdam sab sila si Sean Salvador ug Jalen Garcia sa ilang presensiya uban ang 10 puntos matag usa.

Kontrolado kaayo sa Heavy Bombers ang duwa sukad sila misirit ngadto sa sayong 23-13 nga labaw, nga ilang pang giinat ngadto sa 50-31 sa halftime ug dayon sa 72-43 human sa tulo ka kuwarter sa wapa pa kini miburot ngadto sa 31 puntos, 74-43, sa sayong bahin sa pinal nga kuwarter.

Si Maverick Eligoyo maoy nangu sa Webmasters uban ang 13 puntos, upat ka rebounds, usa ka assist, ug usa ka steal. Sila sai Luther Leonard ug Jepherson Nonol nagkumboya'g 21 puntos, 10 ka rebounds, tulo ka assists, ug duha ka steals sa pildirong kawsa.

Ang pambatong guard sa UC nga si Ricofer Sordilla namugnaw ug nalimitahan ngadto lamang sa singko puntos uban ang tulo ka rebounds ug upat ka assists.

Sa laing bahin, si Christopher Lagat miharos og 24 puntos upat ka rebounds, unom ka assists, ug duha ka steals samtang si Jm Edoukou miamot og 14 puntos ug lima ka rebounds sa dihang gilampaso sa University of the East (UE) Red Warriors ang University of the Visayas (UV) Green Lancers, 98-75, aron pagpahiluna sa ikatulong dapit. — (BANAT NEWS)