LeBron matestingan dayon uban sa Sixers

CEBU, Philippines — Masukod dayon ang katakos ni NBA superstar LeBron James uban sa Philadelphia 76ers.

Kini kay si James ug ang Sixers mopakita'g aksiyon sa usa sa tulo ka mga duwa nga mosikad sa 2026-27 NBA season unya sa Oktubre 21 (oras dinhi sa Pilipinas) diin ang defending champion New York Knicks maoy ilang sangkaon.

Ang NBA all-time leading scorer ug four-time MVP motikang sa korte alang sa rekord niining ika-24 nga season.

Si James nakadaog og kampiyonato sud sa upat ka higayon, kaduha uban sa Miami Heat ug tagsa uban sa Cleveland Cavaliers ug Los Angeles Lakers.

Ang 41-anyos nga si James naglaraw nga hatagan ang Sixers sa una nilang korona sukad niadtong 1983.

Taas ang tsansa nga makab-ot ni LeBron ang iyang misyon kay iyang makauban sila si Jaylen Brown, Joel Embiid, Tyrese Maxey ug VJ Edgecombe sa Sixers.

Malisud hinoon nga tahas ang sagubangon sa 76ers kay ang ilang banggaon mao man ang Knicks, nga modawat sa ilang mga singsing ug moisa sa ilang bandera isip mga kampiyon sa dili pa ang duwa.

Mao kini ang premyo sa Knicks human gipildi ang San Antonio Spurs sa miaging NBA Finals aron sakmiton ang una nilang titulo sud sa 53 ka tuig.

Sa laing bahin, ang 76ers moduwa sa una nilang home game uban ni James sa ilang lineup batok sa Cleveland Cavaliers sa Oktubre 23. Ang Cleveland maoy yutang natawhan ni James ug iya kining gitabangan nga makampiyon niadtong 2016 season.

Samtang si James mobalik sa Los Angeles aron banggaon ang kanhi niya team nga Lakers sa seguradong usa ka emosyonal nga duwa nga gikatakda sa adlaw sa Pasko.

Kon way mga kakulian, si James ug ang anak niyang Bronny lagmit mokulit og laing rekord isip labing unang amahan ug anak nga nagka-atbang og duwa sa kasaysayan sa liga. — (BANAT NEWS)