Magsuon nadakpan sa drug bust
CEBU, Philippines — Duha ka managsuon ang nadakpan sa buy-bust operation nga gipahigayon sa Regional Police Drug Enforcement Unit 7 (RPDEU7) niadtong Martes sa udto sa Rainbow Village, Barangay Kinasang-an, Cebu City.
Nasikop ang mga suspetsado nga giila lamang sa ilang alyas nga “Jonas,” 32 anyos, ug “Jun-Jun,” 30 anyos.
Nakuha gikan sa duha ang kapin 40 gramos sa gituohang shabu nga adunay gibanabanang street value nga P272,000.
Matud sa kapulisan, sulod sa kapin usa ka semana silang nagpahigayon og surveillance sa maong lugar.
Base sa ilang monitoring, gituohang mokabat sa 30 hangtod 40 gramos nga illegal nga droga matag semana ang ginapang-apod-apod sa Managsoon.
Giila usab sa mga otoridad ang Rainbow Village ug ang mga kasikbit nga barangay isip mga lugar nga gimonitor tungod sa giingong kalihokan kalabot sa illegal nga droga.
Samtang, sumala sa kapulisan, ang kontak sa mga suspetsado gituohang gikan sa usa ka jail facility, nga karon kabahin sa ilang imbestigasyon.
Ang duha ka suspetsado anaa na sa kustodiya sa kapulisan ug atubang sa tukmang kaso kalabot sa paglapas sa Comprehensive Dangerous Drugs Act of 2002 (RA 9165). (BANAT NEWS)
- Latest
