Polis namatay sa Leptospirosis

CEBU, Philippines — Gipaubos ngadto sa half-mast ang Philippine flag sa Mandaue City Police Office (MCPO) human namatay si Patrolman Francis Guiza Bocade tungod sa Weil’s disease niadtong Agosto 9.

Nipadayag og pahasubo ang Mandaue City Sangguniang Panlungsod ngadto sa pamilya ni Bocade ug giila ang iyang serbisyo ug sakripisyo isip miyembro sa Philippine National Police (PNP) nga naka-assign sa City Mobile Force Company sa Mandaue City.

Sa resolusyon sa City Council, giingon nga gi-admit si Bocade alang sa medical treatment alas-1 sa hapon niadtong Agosto 8 apan, bisan pa sa medical intervention, namatay siya alas-3:50 sa kaadlawon pagkasunod adlaw.

Si Bocade residente sa Barangay Calipayan sa Municipality of Dagami, Leyte.

Ang Weil’s disease usa ka grabe nga matang sa leptospirosis, usa ka bacterial infection nga dala sa Leptospira bacteria.

Kasagarang makuha kini pinaagi sa pagkontak sa tubig o yuta nga naay ihi sa mga infected nga mananap, ilabina sa ilaga.

Ang infection mahimong makasulod sa lawas pinaagi sa samad o hiwa sa panit, o pinaagi sa mata, ilong ug baba.

 Ang leptospirosis mahimong hinungdan sa hilanat, sakit sa ulo ug kaunoran, ug pagsuka.

Sa mga grabe nga kaso, mahimo kining mosangpot sa kidney ug liver failure ug uban pang komplikasyon nga makamatay.

 “To the family of Patrolman Francis G. Bocade, please know that your deep grief is shared by an entire community and the ultimate sacrifice of your beloved officer will forever be in Mandauehon’s heart,” matud ni Councilor Jennifer del Mar.

Ang MCPO mitug-an nga wala pa sila makadawat sa death certificate ni Bocade sa dihang gipangutana sila sa mga sirkumstansya sa iyang pagkamatay.

Apan, usa ka kasaligan nga tinubdan mitug-an sa mga sakop sa media kagahapon adlawa, Agosto 11, 2026 nga si Bocade bag-o lang gi-deploy atol sa pagbaha sa Barangay Subangdaku, Mandaue City, diin gikatahong na-expose siya sa tubig-baha.

Wala pay opisyal nga kumpirmasyon ang MCPO kung ang maong exposure sa tubig-baha adunay kalambigitan sa iyang pagkasakit.