Webmasters, Heavy Bombers mag-ilog sa korona

CEBU, Philippines — Upat ka sunod-sunod nga kampiyonato sa University of Cebu o duha ka sagunson nga korona sa Jose Rizal University?

Kining pangutana matubag karong gabii (Martes, Agosto 11) sa dihang ang UC Webmasters ug ang JRU Heavy Bombers magbangga alang sa titulo sa Cebu City Collegiate Invitational Basketball Tournament 2026 diha sa Cebu City Sports Institute sa Barangay Sawang Calero.

Magbugno sila sugod sa alas-8 sa gabii human sa alas-6 sa gabii nga sangka alang sa ikatulong dapit tali sa University of the Visayas (UV) Green Lancers ug University of the East (UE) Red Warriors.

Ang Webmasters ni coach Atty. Kernn Sesante naglaraw sa ikaupat nilang sagunson nga tropeyo human sila nakampiyon sa 89th Araw ng Dabaw Invitational Basketball Tournament sa Davao City niadtong Marso, sa 1st Moalboal Commercial Fiesta Basketball League sa Mayo, ug sa 78th Mabungahong Socorro Fiesta Basketball Tournament didto sa Socorro, Surigao del Norte sa miaging duha ka bulan.

Ang Webmasters mosagubang og malisud nga tahas batok sa Heavy Bombers, nga nagtinguha nga moangkon og laing dungog human sila naghari sa 2026 Filoil EcoOil NCAA Preseason Cup duha ka semana pa ang milabay.

Apan ang Webmasters nagpangagot nga makabawos sa Heavy Bombers, nga mipildi kanila sa miagi nilang engkwentro niadtong Agosto 8.

Ang Webmasters nakarekober human nalubong og 27 puntos apan ugaling lang kay napakyas sila sa kinauwahian, 85-89, batok sa Heavy Bombers.

Makapaabot ang mga fans og laing kulbahinam nga kumbati sa dihang ang Webmasters ug Heavy Bombers magpinaksitay na sab sa korte, ning higayona alang sa korona nga nagtangan og P130,000 nga premyo.