Pagsulbad sa kanihit sa tubig

Dunay bag-ong kompaniya nga mitanyag ngadto sa Cebu City government nga mo-supply sila og limpyo nga tubig ngadto sa labing menos 10,000 ka mga pamilya sa Barangay Pit-os, Bacayan, Talamban ug Mabini.

Nindot kining pagahimoon sa Worlds First Water Ventures Inc. kay makasulbad kini sa problema sa mga nagpuyo sa bukirang barangay nga dugay na nga nangandoy nga makaangkon og koneksyon sa tubig, unya way gasto ang siyudad.

Matud ni Engr. Mary Hazel C. Abasolo, ang presidente sa Worlds First Water Ventures Inc., nga ang mga dapit nga ilang serbisyohan mao ang mga wa pa maabot sa serbisyo sa Metro Cebu Water District (MCWD), kang kansang mga lumolupyo nangandoy nga makatubig na.

Gipasabot ni Engr. Abasolo nga mogamit sila og modernong water treatment facility ug distribution network aron hingpit nilang maserbisyohan ang katawhan nga mosalig kanila.

Gani, pagka karon, moabot na og kapin 8,000 ka lumolupyo sa nahisgutang mga barangay ang nagpalista aron nga kon kahatagan na og pagtugot ang ilang kompaniya, makoneksyonan dayon sila og linya sa tubig.

Matud ni Engr. Abasolo nga nangayo sila og resolusyon sa Cebu City Council nga wa silay pagsupak nga moserbisyo ang ilang kompaniya ngadto sa mga lumolupyo. Gamiton usab kini nila pag-apply og Certificate of Public Convenience (CPC) sa National Water Resources Board.

Nagtuo si Engr. Abasolo nga ang serbisyo sa ilang kompaniya makatabang pagpalambo sa panginabuhian sa katawhan diha sa kabukirang mga barangay.

Pagkakaron, ang Cebu City Council miduso ngadto sa MCWD sa suwat sa Worlds First Water Ventures Inc. aron makahatag usab sila sa ilang panahom.

Ang Supreme Court hinoon nakapagawas na og hukom sa usa ka susama nga kaso nga ang pag-supply og tubig ngadto sa katawhan dili kay katungod lang sa MCWD.

Ang rason sa Worlds Water Ventures Inc. nga ang serbisyohan nila nga dapit mao ang sa kabukiran, ug dili mabalaka ang MCWD nga sapawan sila sa ilang serbisyo, kay adto ra man sila sa mga dapit nga wa pa maserbisyohi sa MCWD.

Tan-aw nako niini, wa may problema kay susama ra man ang MCWD ug ang Worlds Water Ventures Inc. og tumong nga mao ang pagserbisyo sa katawhan.

Luoy gyud bitaw ang mga lumolupyo sa bukid nga lisud kaayo ang ilang tinubdan sa tubig kay ang uban kanila, magsalig ra sa mga tabay nga kakuhaan nila og mga tubig nga mainom.

Ang uban nga dunay kaya, makapalit og mineral water nga ilang mainom, apan kon may linya na sila sa limpyong tubig, pwede na gyud nga dili na lang magpalit og mineral water.