Moa tali sa Mandaue City ug CTU giaprobahan

CEBU, Philippines — Ang Mandaue City College (MCC) mapanalipdan batok sa posibleng “poaching” sa mga faculty ug administrative staff niini ubos sa proposed Memorandum of Agreement (MOA) tali sa Mandaue City Government ug Cebu Technological University (CTU).

Si Councilor Carlo Fortuna, sa usa ka interview kagahapon, Agosto 10, miingon nga gilakip ang anti-poaching provision aron mapugngan ang bag-ong CTU Mandaue Campus nga makaapekto sa academic quality ug human resources sa MCC, ilabi na tungod kay posible nga mas daku ang sweldo sa usa ka state university.

Matud ni Fortuna, adunay posibilidad nga madani ang mga magtutudlo sa MCC nga mobalhin sa CTU kung matukod na ang Mandaue Campus niini sa Barangay Looc, nga mahimong makaapekto sa academic operations sa MCC.

Ubos sa Section 6-B sa MOA, dili tugotan ang CTU nga mag-recruit, “mang-pirate,” o mo-hire sa mga aktibong full-time faculty member o administrative staff sa MCC alang sa Mandaue Campus niini.

Ang maong restriction magpabilin sulod sa 24 ka bulan gikan sa pormal nga pagbulag sa empleyado gikan sa MCC, gawas kung mag-isyu og written waiver o No Objection Certificate ang MCC Board of Trustees.

Matod ni Fortuna, ang maong provision gitumong aron masiguro nga ang CTU campus mahimong complement sa MCC imbes nga mahimong kompetisyon niini.

Gitakda usab sa MOA nga dili mag-offer ang CTU og mga undergraduate degree programs nga naa na sa MCC, lakip ang Bachelor of Secondary Education, Bachelor of Elementary Education, Bachelor of Science in Information Technology, Bachelor of Science in Business Administration, Bachelor of Science in Public Administration, ug Bachelor of Science in Industrial Technology.

Gilauman nga ang Engineering programs ang i-offer sa CTU Mandaue Campus.

Matod pa niya, makabenepisyo usab ang mga estudyante sa MCC sa mga pasilidad sa CTU, ilabi na tungod kay pareho ra nga lugar sa Barangay Looc ang pagbasehan sa duha ka institusyon.

Ubos sa MOA, ang mga kwalipikadong MCC students mahimong mogamit sa mga laboratoryo, library, research databases ug specialized equipment sa CTU, ubos sa mga polisiya ug availability sa CTU.

Mahimo usab silang mo-cross-enroll sa high-cost specialized laboratory subjects nga tingali dili kaya sa pinansyal nga kapasidad sa MCC nga mapadayon.

Matod ni Fortuna, ang mga estudyante mahimong makakuha usab og academic units pinaagi sa cross-enrollment nga mahimong ma-credit ngadto sa ilang mga programa sa MCC.

Gilakip usab sa MOA ang faculty mentorship program, joint laboratories ug research initiatives, ingon man joint board examination review sessions alang sa mga programa sama sa education ug engineering.

Ang committee report nga adunay revised MOA gi-aprobahan sa City Council atol sa regular session niini kagahapon, Agosto 10, 2026.

Ang pag-aprobar sa committee report magtugot kang Mandaue City Mayor Thadeo Jovito “Jonkie” Ouano nga mopirma ug mopatuman sa kasabutan uban sa CTU. (BANAT NEWS)