Outing sa youth, 17 anyos nalumos

CEBU, Philippines — Namatay ang usa ka 17-anyos nga lalaki human malumos samtang nanglangoy  uban sa duha pa ka menor de edad sa usa ka beach resort sa Barangay Tungkop, Minglanilla, Cebu, hapit alas-1 sa hapon niadtong Domingo, Agosto 9, 2026.

Ang namatay residente sa Sitio Sta. Ana, Banawa, Cebu City, miadto sa resort uban sa duha ka batang lalaki nga 12 ug 13 anyos, nga residente usab sa maong lugar.

Matud sa Minglanilla Municipal Police Station, nangadto ang tulo sa beach resort isip kabahin sa kalihokan sa ilang youth organization para sa tinuig nga pista sa ilang komunidad. 

Apan gipahimangnoan silang daan sa caretaker nga delikado ang paglangoy tungod sa taas nga tubig ug kusog nga balod niadtong higayona.

Bisan pa sa pahimangno, nangaligo gihapon ang tulo apan gidala hinuon sila sa sulog padung sa lawom nga bahin. Nakabalik og langoy sa baybayon ang 12 ug 13 anyos human gitabangan sa mga kauban apan nitidlom gyud ang 17-anyos ug nalumos. Nakuha ang lawas niini alas 2:35 na sa hapon ug gidala sa Minglanilla District Hospital apan  wala na kini na-revive pa ug gideklarar nga patay na alas 3:40 sa hapon. (BANAT NEWS)