PBA games tuloy sa Antipolo

MANILA, Philippines — Matapos makansela ang ilang laro kamakalawa dahil sa bagyong Maymay at sa habagat, balik-aksyon ang 4 na koponan ngayon upang palakasin ang tsansa nila sa playoffs ng umiinit na PBA Season 50 Governors’ Cup sa Ynares Sports Center sa Antipolo.

Mag-aagawan sa kru­syal na No. 4 seed ng Group A ang Converge (3-4) at Terrafirma (3-4) sa unang sultada sa alas-5:15 ng hapon habang lintik lang ang walang ganti para sa lider na NLEX (6-1) kontra sa reigning champion na Talk ‘N Text (4-3) sa alas-7:30 ng gabi.

Sa katunayan ay nalipat ng venue ang natu­rang double-header mula sa Ninoy Aquino Stadium subalit inaaasahan ang parehong bangis at aksyon sa kalagitnaan ng two-round eliminations.

Ngayon, handa na ulit ang mga koponang mag-unahan sa daan sa bandera ng NLEX na asam ang matamis na bawi kahit pa kontra sa kampeon na TNT matapos magalusan ng Terrafirma, 114-109.

Paborito ang mga bataan ni coach Jimmy Alapag sa rematch nila ng Tropang 5G matapos ang 88-83 panalo ng Road Warriors noong Round 1.

Higanti rin ang hangad ng mga tropa ni coach Chot Reyes upang maituwid ang gewang-gewang nilang kampanya lalo’t unti-unti na rin silang nakukumpleto sa pagbabalik nina Roger Pogoy, Jordan Heading, Poy Erram at Brandon Ganuelas-Rosser.