Ironman 70.3 Lapu-Lapu, malampuson

CEBU, Philippines — Malampuson ang pag-host sa Lapu-Lapu City sa ika-12 nga edisyon sa Ironman 70.3 Lapu-Lapu Cebu, matud ni Mayor Ma. Cynthia “Cindi” King-Chan. Dugang ni King-Chan nga bisan pa og kusog ang baw'd atol sa swimming event, nahuman ang kompetisyon nga walay natala nga incidente. “Although challenging kaayo ang pag swim, pero nindot gihapon ang panahon, manageable ra ang kainit … We are very happy nga successful gyud kaayo ang atong Ironman,” matud sa mayor sa mga reporters kagagapon, Agosto 9. Tungod sa kusog nga hangin, giusab sa organizing team ang swim course alang sa safety sa mga partisipante.

Ang mga professional athletes mipadayon sa orihinal nga 1.9-kilometer swim course, samtang gipamubo ngadto sa usa ka kilometro ang swim course sa age-group athletes.

Nagsugod ang age-group swim event alas 6:10 sa buntag, nga adunay 40-minutos nga cut-off time alang sa revised course.

Wala usab usba ang bike ug run courses, samtang nagpabiling walo ka oras ang kinatibuk-ang cut-off sa tibuok lumba.

Samtang, nagpabiling normal ang schedule sa professional athletes, diin nagsugod ang men's category alas 5:40 sa buntag ug ang women's category alas 5:41 sa buntag.

Gihimo ang pag-usab sa swim course human sa konsultasyon sa Water Safety Team tungod sa kabalaka sa kaluwasan sa mga atleta. Giseguro usab ni Sunrise Events Inc. President ug General Manager Princess Galura nga luwas ug na-account ang tanang swimmers. Matud sa mayor, padayon nga suportahan sa siyudad ang Ironman 70.3 tungod sa importansya sa sports ug sports tourism sa lokal nga ekonomiya.

Sumala pa sa mayor, nakabenepisyo ang mga hotels, restaurants, vendors ug riders sa pag-abot sa mga atleta ug bisita. — /IBM (BANAT NEWS)