Konsehal Sisinio Andales

CEBU, Philippines — Andales nanawagan sa kongreso nga mopasar og balaod alang sa suholan

Nanawagan si Konsehal Sisinio Andales sa kongreso nga mopasar og balaod nga magmugna og usa ka nationwide legislated living wage aron masiguro nga ang tanang mamumuo sa nasud makadawat og igo ug desente nga sweldo.

Si Andales nisubay sa Section 3 sa 1987 Philippine Constitution nga nagmando sa estado nga panalipdan ang mga mamumuo pinaagi sa paggarantiya nga adunay makatawhanon nga kahimtang sa trabaho ug adunay patas nga suholan. Gipadayag ni Andales nga bisan pa sa mga regular nga pagsaka sa minimum nga suholan sa nagkadaiyang rehiyon daghang mga trabahante sa nasud ang padayon gihapon nga naglisod sa pagsustento sa ilang pamilya tungod sa pagsaka sa presyo sa pagkaon, puy-anan, transportasyon, edukasyon, serbisyo medikal, kuryente, tubig ug uban pa’ng batakang panginahanglanon.

Gitumbok ni Andales nga ang kasamtangang sestema sa regional wage determination niresulta og dakong kalahian sa minimum nga suholan tali sa mga rehiyon bisan pa nga nagpadayon og pagsaka sa presyo sa mga batakang produkto nga nakaapekto sa tanang Pilipino diin adunay mga indibidwal nga dili makapalit sa ilang ubang panginahanglan tungod sa kakuwang sa ilang madawat nga sweldo.

Kun adunay legislated living wage dili lang kini magtutok sa paghatag og igo nga suholan aron mabuhi ang usa ka pamilya apan maghatag usab kini kanila og kapasidad sa pagmentinar sa maayong panglawas, makapaeskwela sa ilang mga anak ug adunay igo nga ikapalit sa mga panginahanglan.

Dako usab ang pagtuo ni Andales nga ang igo nga suholan mao ang makahatag og inspirasyon sa mga mamumuo nga magkugi sa pagpanikaysikay, makadungag sa konsumo sa mga konsumidor ug makapalig-on sa ekonomiya.

Gihisgotan sa napasar nga resolusyon ni Andales ang bag-ohay lang nga naaprobahan sa Department of Labor and Employment (DOLE) ang Wage Order No. NCR-27 nga gidungagan og P85 matag adlaw ang mga mamumuo sa National Capital Region (NCR) ug gikonsiderar kini nga pinakadakong wage adjustment sa rehiyon. Si Andales nanawagan sa kongreso tungod kay mao kini ang labing angayan nga institusyon nga makapanday og komprehensibong balaod nga maghatag og igo nga suholan.

Gawas sa kongreso, buot usab masayod ang konsehal sa aksyon sa Senado, DOLE ug National Wages and Productivity Commission aron mahatagan og makatawhanon nga suholan ang mga mamumuo lukop nasud. — /BDB (BANAT NEWS)