Career o girlfriend?

Dear Tito Miguel,

Maayong adlaw kaninyo. Ako diay si Phillip Eric, taga Consolacion, Cebu ug gusto unta ko mangayo og tambag bahin sa akong relasyon sa akong girlfriend nga si Shantelle. Naa koy oportunidad nga makatrabaho sa Manila. Para nako, dako ni nga chance aron makat-on, makapalambo sa akong career, ug makatabang usab sa among kaugmaon. Mao nga gusto gyud nako siyang dawaton.

Pero ang problema, dili pabor si Shantelle nga moadto ko ug magtrabaho sa Manila. Dili siya mosuporta sa akong desisyon ug murag dili gyud siya gusto nga mobiya ko, bisan pa og temporaryo lang.

Gisabot nako ang iyang kahadlok. Basin mahadlok siya nga tungod sa kalayo, mausab among relasyon, o basin adunay mahitabo nga dili namo kontrolado. Pero sa akong side, gusto pud ko nga hatagan og higayon ang akong kaugalingon nga mo-grow ug makab-ot ang akong mga pangandoy. Usahay maglibog ko kung unsa ba gyud ang akong unahon, ang akong career ug oportunidad, o ang gusto sa akong girlfriend nga magpabilin ko dinhi. Dili ko gusto nga tungod sa akong pag-adto sa Manila, mawala si Shantelle sa akong kinabuhi. Pero dili pud ko gusto nga moabot ang panahon nga magbasol ko kay wala nako gisulayan ang oportunidad nga ania na sa akong atubangan.

Unsa ang imong ikatambag? — Phillip Eric

* * *

Phillip Eric,

Masabtan ang iyang kahadlok. Tinuod, dako ang posibilidad nga mausab inyong gibati kun malayo mo sa usa’g usa. Dili ninyo ni tuyoon, sa hinay hinay mora’g maanad mo nga wala mo magkuyog, hangtod nga mabugnaw mo sa usa’g usa.

Apan ang tinuod, nahadlok siya nga makakita ka’g lain, matintal ug magbudhi kaniya. Usa sab kini ka posibilidad. Maski unsaon nimo’g saad ug pasalig, dili siya makampante. Hasta ikaw sa imong kaugalingon mismo dili ka kapasalig nga magpabilin ka’ng sinsero kaniya. Pasabta siya nga unsa kaha’g inyo himoon nga sukod sa inyong gugma ang malayo mo sa usa’g usa. Ka’y kun dili pa lig-on o lawom inyong gibati sa usa’g usa, dali ra kini mahagba sa mga panuway. Gani, mahimo man mo magkontakanay kada adlaw, ini’g mata ninyo o sa dili pa matulog mahimo mo mag- video call.

Pero ang iyang problema ka’y wala siya’y salig kanimo. Maski adlaw adlaw mo mag-istorya, magduda gihapon siya nga duna ka’y gibuhat. Kun mao, kani ang buhata, unsa kaha’g kuyogon nimo siya? Mahimo man sab siya mangita’g trabaho didto sa Manila.

Sa maong paagi kuyog gihapon mo samtang imong gipahimuslan ang oportunidad nga molambo sa imong career. Kun mosugot maayo. Kun dili, ngano kaha. Kun dili sab siya kabiya sa iyang pamilya o trabaho ba kaha o lay-an siya o hasolan, nagpakita lang kini nga dili siya andam mosakriprisyo para ninyo duha. Pero ikaw sayon sayonon ra niya’g pugong. Hunahunaa’g maayo kun mao na ang mahitabo. —Tito Miguel

Magpatambag ka? Ipada kang Tito Miguel:0991-318-9366