Substandard projects ng DPWH, tatalupan sa Senado
MANILA, Philippines — Tututukan ni Senate Blue Ribbon Committee Chairman Erwin Tulfo ang pag-imbestiga sa mga palpak na proyekto ng Department of Public Works and Highways (DPWH) kasunod ng mga isyu na mabilis nasisira sa konting pag-ulan lang.
Ayon kay Tulfo, bukod sa mga bagong pangalan at isyu na may kaugnayan sa anomalya sa flood control, iimbestigahan din ang mga substandard na proyekto tulad ng mga tulay, kalsada, at iba pang pampublikong pasilidad na malinaw na hindi sumunod sa mga pamantayan.
“Halatang may korapsyon diyan dahil binigyan ka ng pera o budget para sa mga proyektong iyan pero ‘di natatapos o ‘di kaya naman substandard,” dagdag ni Tulfo.
Ayon kay Tulfo, kinakailangan na ang imbestigasyon na ito lalo na’t kamakailan lamang ay gumuho ang isang malaking retaining wall sa kahabaan ng EDSA-Ayala northbound sa Makati City matapos ang sunud-sunod na bagyo. Nagdulot ito ng matinding buhul-buhol na trapiko nang mabarahan ang dalawang pangunahing linya ng daan.
Agad itong kinondena ni DPWH Secretary Vince Dizon matapos matuklasan na ang gumuhong bahagi ay gawa lamang pala sa hardiflex sa halip na matibay na semento.
Bagama’t binigyang-diin ni Senador Tulfo ang kaniyang kahandaan na palawakin ang pagsisiyasat sa flood control issue kapag may mga pangalan ang lumutang, nilinaw rin niyang tututukan din ng Blue Ribbon Committee ang mga nakabinbin na mga isyu ng korapsyon sa iba pang ahensiya ng gobyerno.
- Latest
