Traffic enforcer binaril ng sinitang rider, todas!
CAVITE , Philippines — Isang traffic enforcer ang binalikan at binaril ng isang motorcycle rider na may angkas na babae matapos i-impound ang sasakyan nito kasunod ng kanilang pagtatalo dahil sa hindi pagsusuot ng helmet, kamakalawa ng hapon sa Congressional Road, Brgy. Burol 1. Dasmarinas City.
Kinilala lang ang biktima sa alyas na “Ranso,” 36 anyos, traffic enforcer ng Dasmarinas City, at residente ng Brgy. San Isidro, Labrador 2, ng lungsod, habang ang suspek ay tinukoy sa alyas “Cezar,” residente ng Brgy. H2. Dasmarinas City; pawang sa Cavite.
Base sa imbestigasyon ng pulisya, dakong alas-5:48 ng hapon sa tapat ng Baliwag Lechon Manok habang nakatayo ang biktima kasama ang isa pang traffic enforcer nang dumating ang suspek na armado ng maiksing baril at binaril sa ulo ang biktima bago mabilis na tumakas.
Bago ang insidente, naka-duty at abala sa pag-aayos ng trapiko ang traffic enforcer sa kasag- sagan ng pag-ulan at pagbaha nang sitahin nito ang isang motorsiklo na sakay ang isang lalaki at isang babae dahil kapwa walang suot na helmet.
Hinanapan nito ng lisensya at dokumento ng motorsiklo ng lalaking driver subalit expired na ang registration nito at wala ring maipaking lisensya bunsod upang i-impound ng biktima ang motorsiklo.
Ilang oras lamang nang bumalik ang rider at kinausap ang biktima na ibalik na lang ang kaniyang motorsiklo. Tinangka pa umanong suhulan nito ang traffic enforcer para maibalik ang motor nito kung kaya nagkaroon muli sila ng pagtatalo.
Sa galit ng suspek, bumunot na siya ng maiksing baril at binaril sa sentido ang traffic enforcer saka mabilis na tumakas ang una.
Agad namang naitakbo sa ospital ang biktima pero binawian ng uhay habang nilalapatan ng lunas kahapon ng hapon.
Hawak ng pulisya ang motorsiklo, habang tinutugis pa ang tumakas na suspek.
- Latest
