Plate Spotter Website gilusad sa LTO-7

CEBU, Philippines —  Gilusad sa Land Transportation Office (LTO)-7 ang bag-ong online platform nga makatabang sa mga motorista pagsusi kung anaa na ba o asa nahimutang ang ilang motor vehicle ug motorcycle license plates sa dili pa sila moadto sa opisina sa LTO.

Opisyal nga gilusad ni LTO-7 Regional Director Atty. Wendel C. Dinglasan ang LTO-7 Plate Spotter Website, aron mas mapaspas, mas sayon ang pagkuha sa mga plaka sa mga motorista sa Central Visayas.

Sukad niadtong Agosto 7, 2026, ang mga motorista nga adunay sakyanan nga narehistro ubos sa LTO Region 7 mahimong maka-access sa www.lto-r7-platespotter.ph ug makapangita sa ilang license plate gamit ang plate number o MV File Number. Ang serbisyo alang sa mga motorista kansang MV File Number nagsugod sa 0701 o 0716 aron masusi kung asa nga LTO office ang ilang plaka nga andam na alang sa pagkuha.

Niining paagiha, malikayan ang dili kinahanglang pag-adto sa mga opisina sa LTO aron lamang mangutana sa kahimtang o lokasyon sa ilang plaka.

 “Public service should be accessible, efficient, and convenient,” matud ni Dinglasan.

Iyang gipasabot nga pinaagi sa Plate Spotter Website, gihatagan ang mga motorista og mas sayon nga paagi sa pagpangita ug pagkuha sa ilang mga plaka samtang gipaduol sa gobyerno ang serbisyo ngadto sa katawhan pinaagi sa digital innovation.

Sumala sa LTO-7, kabahin ang maong inisyatiba sa ilang paningkamot nga gamiton ang digital technology aron mapauswag ang paghatag og serbisyo publiko ug maminusan ang kahasol sa mga motorista. Nagpagawas usab ang ahensya og step-by-step video guide aron matabangan ang mga motorista sa paggamit sa Plate Spotter website ug sa pagtino kung asa nila makuha ang ilang mga plaka.