Flood scam sa Sugbo
Wala pay bisan usa ka politiko, opisyal sa Department of Public Works and Highways (DPWH) o kontraktor sa Sugbo nga napasakaan og kaso tungod sa flood control scandal:
Kapin sa tuig na human sa “Mahiya naman kayo” nga State of the Nation Address ni Presidente Ferdinand Marcos Jr. sa Hulyo 28 sa niaging tuig; ug
Dul-an sa tuig human nipasangil si DPWH Secretary Vince Dizon nga nisamot ang baha kay sayop ang mayoriya sa flood control projects sa Sugbo nga gigastohan og kapin P50 bilyones sa niaging 10 ka tuig.
* * *
Mga timaan nga ang nasudnong mga ahensiya sa gobiyerno maayo lang sa pagarpar pero wala gyod makatuman sa saad sa pagsilot sa gidudahan nga labing dagkong kawatan sa ghost ug substandard projects sa Sugbo:
Nipasidaan ang Department of Trade and Industry niadtong Oktubre 25, 2025 sa posibleng pag-blacklist sa QM Builders ug ubang mga kontraktor nga gipaubos sa imbestigasyon sa Philippine Contractors Accreditation Board; ug
Nipahibawo si Dizon niadtong Disyembre 18, 2025 nga ikiha na ang lokal nga mga politiko, DPWH officials ug private contractors sa Enero karong tuiga.
* * *
Mahimo hinuong duna nay makasohan pero wala pa nganli ang 20 ka sinumbong nga gipahibawo sa Department of Justice nga gikiha sa National Bureau of Investigation niadtong Hulyo 29 tungod sa giingong duha ka ghost projects sa Singsing, Balamban, Cebu.
Ambot tsamba ba lang nga ang mga proyekto nahimutang sa ikatulong distrito kansang mga kongresista wala mo-impeach ni Bise Presidente Sara Duterte (si Pablo John Garcia sa niaging tuig ug iyang asawang si Karen Flores karong tuiga).
* * *
Mga kaatbang ba lang sa administrasyon ang apikihon? Among nahibaw-an nga gipa-imbestigar ang implementasyon sa mga proyekto sa unang distrito sa Cebu City kay si Kongresista Cutie del Mar wala sab mo-impeach ni VP Sara sa niaging tuig ug karong tuiga.
Makaginhawa ba og luag si Kongesista Shun Shimura sa ikaupat nga distrito sa Sugbo nga wala sab mo-impeach ni VP Sara karong tuiga? Kay ang flood control projects sa iyang distrito gipasiugdahan sa iyang gipilde sa niaging eleksiyon nga si kanhi Kongresista Janice Salimbangon nga nibotar para sa impeachment ni VP Sara sa niaging tuig?
* * *
- Latest
